Пырля чумырген «курыкымат савыраш», эҥерымат пӱялаш лие

Тыге шотла Изи Агытан ялын старостаже Лариса Икрянникова

Ял староста шуко поро пашам шуктен. Тудын тыршымыж дене теве мыняр ий почеш Изи Агытан ял калык пӱртӱс газ дене пайдалана. Ялыште шӱгарлам тӱзатыме. Тыгак Лариса Геннадьевна кажне ийын ял калык дене урем-влакым, пӱян территорийжым, отым да моло общественный верым тӱзатыме да эрыктыме шотышто субботник-влакым эртара.

Ты ганат эртыше каныш кечылаште Лариса Геннадьевна субботникым эртарен. Ветеран-влак да молат савам, шаньыкым, шӱкшакым погаш мешакым налын келшен пашам ышташ тӱҥалыныт. Шӱкшакым погеныт, корно тӱрым соленыт. Икманаш, Изи Агытан ял моторын да арун койжо манын, шкешт деч шогышыжым чылажымат ыштеныт.