Мемнан календарь

Чӱчкыдынрак вуй ӱмбалне неле шем пыл пєрдеш, йӱр йӱрын кая. Кече ончалме годым шокшо гынат, южышто шєртньӧ шыже лишемме пуш палынак шижылтеш. Туге гынат эше кеҥеж шкенжын тӱжвал тӱсшым кугунак вашталтен огыл: лышташан пушеҥге-влак тугаяк ужар кудыр вуян шогат. Яра кийыше мланде ӱмбалат ужар леведышыжым кудашын огыл. Лач олыкла ден пасула гына талукын вес пагытше – шыже шушашым палдарат.

Олыкла ӱмбач шудым солен, каванлаш чумырымо. Нунын кошар вуйышт кӱшкӧ нӧлтын, пуйто чынжымак кандалге-вулно тӱсан неле шем пылым чараклен шогат. Солен налме деч вара лекше кайшудым пӧжген, ушкал кӱтӱ коштеш да кочкын темше имне-влак олык аркалаште каналтен кият, я нералтен шогат.

Кайык-влакын сӧрал семышт гын йӧршын огеш йоҥгалт. Шошым толшо мурызо кайык-влак мӱндыр корныш – шокшо верыш каяш ямдылалтыт. Посна шогылтшо пушеҥгыла вуйышто гына шемын палдырнен теве ик вере, теве вес вере олагорак-влак, нерыштым эрыктылын, шыпак шинчылтыт да коклан ош тувыр ӱмбач шем джемперым чийыше шогертенын воштылал-воштылал колтымо йӱкшӧ шокта.

Кокияш ден икияш шурно пасу чараҥ шумо гаяк. Тушто утларакше олым ора-влак шинчалан пернат. А чара пасу ӱмбалныже юалгырак мардеж куржталеш. Вес ийлан ӱден кодымо кокияш шурно пасу тылзе мучашеш шемем возеш.

Чодыраште тӱрлӧ-тӱрлӧ поҥго – мамык тӱран, комбо гай ош курезе, шемалге-кӱрен теркупшан кӱжгывурго, ӱйвоҥго, куэвоҥго да молат курш дене мийыше еҥ-влакым вучат.

Кеҥежымсе шкенжын уло поянлыкшым пӱртӱс мыланна пуа. Тугеже ме тудын чыла тиде поянлыкшым – шурнымат, емыж саскамат жапыштыже поген налшаш улына. Уке гын, нуным йӱштӧ кочкын кая.