«Башнефть-Добычаште» профессийыште эн сай-влакым палемденыт

Сеҥыше-влак коклаште Калтаса районысо подразделенийыште тыршыше пашаеҥ-влакат улыт

Тений «Профессийыште эн сай» смотр-конкурс вич производственный площадкылаште эртен, нунышт Уфа ола ден Уфимский районлаште верланен лийыныт. Профессийыште эн сай титул верч 108 участник кучедалын. Нуно чыланат «Башнефть-Добыча» структур подразделенийласе эртыше отборочный этаплаште сеҥеныт.

Тиде конкурсышто пашаеҥ-влакын профессиональ мастарлыкыштым шымлымаш ик эн тӱҥлан шотлалтын. Моло ийлаштат тыгак лийын. Тений гын конкурсым организоватлыме шотышто изишак вашталтыш-влак лийыныт. Предприятийыште, республикысе эпидемиологий ситуацийым шотыш налын, чыла лӱдыкшыдымылык мерым шуктен толыныт. «Башнефть-Добычаште» компанийын тӱҥ поянлыкше еҥ-влак манмым мут дене гына огыл, а паша дене ончыктеныт. Температурым висеныт, маске, перчатке, дезинфекций средстве, социальный дистанций – чыла тидым шотыш налме. Тиддеч посна, пӧлем-влакым, кушто таҥасымаш-влак эртеныт, южым обеззараживатленыт. Тидлан лӱмын кӱлеш оборудованийым налыныт.

Туге гынат, профессионал мастарлык конкурсышто икте вашталтде кодын, тиде – тыглай пашаеҥын пашажым аклымаш да пагалымаш.

Смотр-конкурсын теорий да практике ужашыже-влакым иктешлымеке, 14 номинацийыште сеҥыше-влакым палемденыт. Эн виян профессионал-влак коклашке тыгак «Башнефть-Добычан» Калтаса районысо подразделенийыштыже тыршыше пашаеҥ-влакат логалыныт.

Лаборант Ольга Гильмиярова

Кӧтерем селасе «Калтасы» испытательный химико-аналитический лабораторийыште тыршыше Ольга Гильмиярова «Лаборант химического анализа» номинацийыште сеҥен. Краснохолмский села гыч Екатерина Косотухина «Геолог» номинацийыште кокымшо верым сеҥен налын.

Ик жап гыч Ольга Гильмиярова моло сеҥыше-влак семынак, смотр-конкурсын финал этапыштыже «Башнефть-Добычан» чапшым аралаш тӱҥалеш.

Кодший гын башкир нефтяник-влак корпоративный конкурсын финал этапыштыже чумыр команде дене кокымшо верым сеҥен налыныт.

Э. Мурсакаева.