Кургак ила да пеледалтеш

2016 ийыште Кургак ял ик эн ончыч Поддержка местных инициатив программе почеш корным олмыктен. Нелылык лийын, туге гынат ял калык результатлан куанен. Эн тӱҥжӧ корно шотышто проблемым решатлыме.

Ялыште шӱгарла шотыштат проблеме лийын. Кеч тудо ий еда эрыкталтеш гынат, пу гыч ыштыме пече шӱйын да шаланаш тӱҥалын. Кугу Качак ялсовет вуйлатыше Г.Д. Хайдаршин тудым «Реальные дела» программе чоҥеш олмыкташ темлен. Ял калык тидын дене кӧнен, ялсовет вуйлатышын темлымыжым поддержатлен. Но программын ойырымо окса чыла тиде сомылым шукташ ситен огыл. Сандене тудым ял калык деч погеныт, тыгак мӱндырнӧ илыше еҥ-влакат ӧрдыжеш кодын огытыл, полшаш лийыныт.

Кӱлшӧ материалым налыныт да шке вийышт дене ял калык шӱгарлам металлический штакетник дене печылен да инвентарьым аралаш изирак пӧртым чоҥен.

Кургак ялын старостаже семын, мый нунылан да ты ялын шочшыжо-влаклан ты проектыште участвоватлымыштлан кугу таум каласынем. Тӱҥ пашам шуктышо еҥ-влакым поснак палемдынем: сварщик Шакирзянов Александр, Гадыршин Олег да тудын полышкалышыже-влак Гиндуллин Вячеслав, Гадыршин Марат. Тыгак Кашпуллин Фирдауслан, Зайдуллин Хадислан, Янбулатов Гавриллан, Зайдуллин Архиплан, Надыров Леонидлан, Абдуллин Афанасийлан, Галяхметов Филюслан, Камалов Гафурлан, Мукамышев Ринатлан тау. Ялыште илыше самырык еҥ-влакат ӧрдыжеш кодын огытыл. Тиде Ильбаев Константин, Галяхметов Никита, Фаршатов Алмаз, Созыкин Роман, Насипов Эмиль, Галлямов Эдуард. Нуныланат тау.

Мемнан ялыште поро кумылан, шке шочшышт верч ойгыртышо еҥ-влакын илымыштлан мый моткоч куаненам. Мый ӱшанем, ялым тӱзатыме паша тидын дене ок мучашлалт. Тек мемнам ончыкыжымат у план ден проект-влак вучат, а ялна илышаш да пеледалтшаш.

О. Галямшин,