Газетлан ӱшанле улмылан – приз Серафима Канданова – «Орион» торгайыме пӧрт деч пӧлек сертификатым налын

Район газет арняште кок гана лектеш да тудым лудшо-влакым тӱрлӧ оҥай увер ден материал-влак дене куандараш тырша. Меат нуным, шкенан лудшына-влакым, куандараш тыршена – подписчик-влак коклаште розыгрышым эртарена. Шукерте огыл 2020 ийын кокымшо пелыжлан «Калтаса ӱжара» ден «Калтасинская заря» газет-влаклан сералтше-влак коклаште розыгрыш эртыш.

Тиде розыгрышышто Краснохолмский села гыч Серафима Канданова «Орион» ТД деч 5000 теҥгылан пӧлек сертификатым модын налын. Тудо мемнан газетым ятыр ий лудеш.

– Йоча годым ава ден ачам «Ӱжара» газетым налыныт, – каласкала мыланна Серафима Айдимировна. – Кастене авана мыланна тудым йӱкын лудын. Кызыт «Калтасинская зарям» налына.

Серафима Айдимировнан мутшо почеш, тудо кажне розыгрышыште участвоватлаш тырша. Ик гана стакан-влак дене графиным модын налын лийын. Приз изи, а куанже кугу. Автолюбитель-влаклан розыгрышыштат участвоватлаш тыршат. Тиде гана тудлан пиал шыргыжалын, кеч тудо иктаж-мом модын налам манын ӱшаненат огыл.

– Квитанцийым редакцийыш мый розыгрыш деч икмыняр кече ончыч гына конденам, – ойла сертификатын пиалан озаже. – Эре мый модын ом нал дыр, очыни, шоналтышым. Кунам эргым йыҥгыртыш да призым модын налмем нерген увертарыш, ме Элеонора ӱдырем дене моткоч чот куанышна. Морозильный камерым налаш шонена. Тений ме моткоч шуко емыжым погышна, сандене морозильный камерым налаш кӱлеш. Конешне, сертификат сай пӧлек, кеч-могай подписчикат тудлан куана. Бытовой техникым налме годым тудо кугу полыш лиеш. Серафима Кандановам районышто шукыжо йӧратыше ава семын пала. Вет тудын Элеонора ӱдыржӧ шочмыж годсек нелын черле улеш. Пелашыже Олег Викторович дене пырля ӱдырыштын илышыже моло-влак деч ынже ойыртемалт манын, чыла ышташ тыршат. Ме нунын дене тӱрлӧ мероприятийыште вашлийна. Нуно шке сеҥымашышт нерген район газетышке чӱчкыдын возен шогат.

– Ме «Зарям» моткоч йӧратена, – ойла район газет нерген Серафима Айдимировна. – Кызыт ӱдырем дене коктын тудым йӱкын лудына. Поснак район историй, палыме землякна-влак, школ увер, туныктышо, ялозанлыкыште тыршыше еҥ-влак нерген материал-влак келшат. Йӧратыме газетналан ончыкыжымат пеледаш, а чыла лудшылан – сеҥымашым тыланен кодына. Газетлан сералтса да призым модын налза. А ме лудшыналан газетлан ӱшанле лийын кодмыжлан кугу таум каласена.

О. Айгильдина.