Кучашмытлан корно кеч-кунамат шерге лийын

Савакмарий ялсовет ял илемын Татар Пекшык ялыште Центральный уремыш да Кучашыште Мостовой уремыш шаргӱм шареныт. Эше кум уремым тӱзаташ палемдалтеш.

… Кучаш ялыш толмо кечын Мостовой уремыште корно паша шолын. Грейдерын машинистше Георгий Чануков ошма-шаргӱ вартышым тӧрлен. Корно тӧр да мотор лиймыжым ужын, техникым уста специалист виктара манын вигак каласаш лиеш.

Тыштак ме Савакмарий ялсовет вуйлатыше Ринат Арслановым вашлийна.

– Шукерте огыл ме Татар Пекшык ялыште Центральный уремым тӧрлышна, – каласыш тудо. – Ындыжым теве Кучаш ялыште технике пашам ышта.

Ялсоветым вуйлатыше дене мутланымаш гыч пален нална, корно пашам шукташлан торгышто Фаршатов ИП сеҥен. Нуно ты кугу пашам шуктат.

Эше тидым палемдаш кӱлеш, кучашмытлан корно – тиде пӱсӧ теме. Ял калык кушко гына вуйшиймашым возен огыл.

– Тудым эркын-эркын решатлена, – каласыш Р.М. Арсланов. – Кызыт Савакмарий ялыште Иргибай Тимирбаев лӱмеш уремым олмыктымо шотышто торгым увертаренна. Тыгак ялсоветыште эше кум уремым тӱзаташ планна уло, – умыландарыш мыланна ялсовет вуйлатыше.

Мемнан корр.

Мемнан справкына:

Район администрацийын чоҥымаш, промышленность да ЖКХ пӧлкаште кузе каласышт, мемнан район ялласе уремлаште корным олмыктымо паша умбакыже шуйна. Ты сомыл республике бюджет гыч оксам ойырымо дене ышталтеш. Тачысе кечылан Кокла Качмаш, Кугу Агытан, Шоръял, Келтей, У Яш яллаште, Краснохолмский да Калтаса селалаште ты оксам кучылтмо. Моло яллаштат корным тӧрлымӧ паша шотышто у торг-влакым организоватлыме лиеш.