Калтаса районышто ийготыш шудымо икшыве-влакын транспорт средствм виктарымышт нерген ойленыт

Калтасаште ийготыш шудымо икшыве-влакын транспорт средствм права деч посна виктарымылан 5 административный материалым тергыме

Руль воктене ийготыш шудымо йоча – тиде таче корно движений участник-влакын посна тӱшкашт. Нуно шкаланыштыт да воктен улшо еҥ-влаклан кугу лӱдыкшым ыштат.

Руль воктеке шичше ийготыш шудымо икшыве могай туткарым ыштен кертеш да кӧ вара тидлан мутым кучаш тӱҥалеш? Тыгай йодыш-влакым ийготыш шудымо икшыве-влакын пашашт шотышто комиссийыште лончыленыт. Тыште нунын дене кылдалтше 5 административный материалым – транспорт средствм права деч посна виктарымылан – ончымо лийын.

17 ияш рвезе, тудын водитель праваже уке лийын, мотоцикл дене коштын толаш шонен, весыже мопед дене. Эше икте, тыгак права деч посна, ачажын машинаже дене кудалын. Нылымше рвезе, аваже пӧртыштӧ лийын огыл, машинам налын да йолташыже-влак дене коштын савырнаш лийын. А визымше рвезе, кугырак-влак компнийыште тудо эн айык лийын, руль воктеке тудым йолташыже-влак шынденыт.

Очыни, кажне рвезылан мопед, мотоцикл але автомобиль дене кудалмаш – тиде эрыкым шижмаш. Мототехнике гын кеч-могай ял корныштат кудал кертеш. Вет секрет огыл, ялыште илыше шуко еҥын кызытат гаражыштыже «Минск», «Иж-Планета», «Юпитер» шогат. Ача-ава-влак шке йочаштлан тудын дене кудалышташ разрешитлат. Чынак, молан паша деч посна коштеш, тек кӱртньым кӧргынчеш, пайдаже шукырак лиеш. Южгунам технике дене пайдаланымаш корно правилым пудыртымашке шуктен кертеш. А кушто корно правилым пудыртет, тушто эре сусыргымаш, трагедий.

Конешне, кунам самырык еҥ шке «кӱртньӧ имньыжым» кушкыж шинчеш нимогай трагедий нерген ок шоналте, очыни.

Кеч-могай транспорт средстве моткоч лӱдыкшӧ улеш. Мастарлык, водительын опытшо да профессионализмже деч тудын илышыже веле огыл, тыгак корно движенийын моло участникшын илышыжат шога. Права деч посна кудалыштше ийготыш шудымо икшывын титакшылан кӧра шагал огыл аварий лиеш. Комиссий ончымо материаллаште нине икшыве-влак нимогай трагедий ден аварийым ыштен огытыл. Нуным чылаштымат жапыштыже полиций пашаеҥ-влак чарен шогалтеныт. Администартивный Кодексын 12.7 статьяжын 1-ше ужашыже почеш, вигак штрафым тӱлаш ыштыктат. Тудын кугытшо 5 гыч 15 тӱжем теҥге марте. Нунылан чылаштланат штрафын эн изи кугытшым – 5 тӱжем теҥгем тӱлаш ыштыме. Тиддеч вара нуно руль воктеке права деч посна огыт шич манын, ӱшаныме шуэш.

С. Аркадьева.