Комиссий школ-влакын ямде улмыштым терген

Кодшо арнян район комиссий школ-влакын у тунемме ийлан ямде улмыштым терген

Коронавирус пандемийлан кӧра, у тунемме ийлан школ-влак кузе пашам ышташ тӱҥалыт але пале огыл. Премьер-министр Михаил Мишустин, чыла 20 август деч вара гына пале лиеш манын каласен. Туге гынат, йоча-шамыч сентябрь гыч мӧҥгыштӧ але класслаште тунемаш тӱҥалыт гынат, школ ден йочасад-влак садыгак икшыве-влакым вашлияш ямде лийшаш улыт. Районысо межведомственный комиссий, тудо кугыжаныш пожар надзор, полиций, образований пӧлкан пашаеҥже-влак гыч шоген, тиде арнян школам тергаш лектын. Тӱҥ шотышто чыла школ ден йочасад у тунемме ийлан ямде улыт. А ситыдымаш-влак улыт гын, нуным у тунемме ий тӱҥалме марте кораҥдаш лиеш.

Комиссий член-влак тӱҥ тӱткышым лӱдыкшыдымылыклан ойыреныт, охраным организоватлымашым, видеонаблюдений, оповещений системе-влак улмым да молымат тергеныт. Тергыме пашам иктешлымеке комиссий сеҥыше-влакым палемден.

Ик кече комиссий дене пырля мыят школла еда коштым. Ужмемым да колмемым тыланда каласкалаш лийым.

Киябак ООШ

Тиде школ районысо ялысе школ-влак гыч эн мотор да эн сай. Тыште йоча-шамычлан чыла шотыштат сай лийже манын, зданийын архитектурыжымак тыге шонен ыштыме, докан. Волгыдо да кугу класс-влак, спортзал, тӱрлӧ мероприятийым эртараш актовый зал да моло пӧлем-влакат.

– Мемнан школышто тӱҥ шотышто Киябак, Шоръял да Краснохолмский селасе йоча-влак тунемыт, – каласкала школ директор Исламова Анжела Вячеславована. Тений тышке 104 йоча тунемаш толеш. Икымше классыш – 9 икшыве. У тунемме ийлан ме школышто косметический олмыктымо пашам шуктышна, кушто кӱлеш чиялтышна, ошемдышна. Тунемше-влаклан уэмдыме да чиялтыме класс ден школ коридор келша манын ӱшаныме шуэш.

Савакмарийысе йочасад

Тиде йочасадын коллективше кажне ийын комиссийым шкенжын приусадебный участкыже дене куандара. 10 сотык мландыште пареҥгым да моло тӱрлӧ пакчасаскам куштат.

– Кодший уто пареҥгым йочасадын коллективше пазарыште ужален да окса дене тӧрзалан тюльым налынна, – каласкала Краснохолмский селасе «Теремок» йочасадын вуйлатышыже Надежда Евгеньевна Лиховских. – А тений мемнан тиде филиалышке пакчасаска ден вожсаска-влакым налаш ок кӱл. Тидлан кӧра ача-ава-влак йочасадлан шагалрак оксам тӱлаш тӱҥалыт.

Тений Савакмарий ялысе «Рябинушка» йочасадыш 21 йоча кошташ тӱҥалеш. Тиде Савакмарий ден Торасола ялла гыч. Тыште кок воспитатель тырша – Марина Геннадьевна Иргибаева ден Наталья Михайловна Имакаева.

Актыган ООШ

Тиде школышто вич ял гыч йоча-шамыч тунемыт: Актыган, Уял, Тошто ден У Яш ял-влак да Братовщина. Тений тыште 87 йоча тунемаш тӱҥалеш, икымше классыш ныл икшыве толеш. У тунемме ийлан школ вашталтын. Косметический олмыктымо пашам шуктымо. Поснак спортзалым уэмдыме. Тыште «Реальные дела» партий проект почеш капитальный ремонтым ыштыме.

– 25 кече жапыште ме спортзалын кӧргӧ тӱсшым вашталтышна, – каласкала физкультурым туныктышо Юрий Григорьевич Ибакаев. – Олмыктымо пашам шукташ туныктышо-влак гына огыл, тыгак тунемше-влакын ача-аваштат полшеныт. Тидлан нунылан кугу таум каласыме шуэш.

Спортзалым почмо нерген ме газетнан кодшо номерыштыже каласкаленна ыле. Иктым гына ешарыме шуэш, тек у спортзалыште сеҥымашыжат шукырак лиеш.

Павасола КШ

Павасола школ у, типовой. Тудо районышто эн мотор. Школ территорийым тӱрлӧ пеледыш, пушеҥге, вондер сӧрастарат. Кажне ийын туныктышо-влак пеледыш клумбо-влакым тӱзатат. Пелдыш-влак тугай сылне улыт, ончен шерет ок тем.

Тыште тений куд ял гыч 115 икшыве тунемаш тӱҥалеш. Тиде Павасола, Васола, Калмиямучаш, Султанай, Надеждин ден Барьязе ялла гыч.

Коллективын погынымаште район администраций вуйлатышын алмаштышыже Елена Анатольевна Алексеева туныктышо-влакым школым у тунемме ийлан сайын ямдылымылан тауштен да тазалыкыштым аралаш йодын.

– Чыланат черланаш тӱҥалыда гын, кӧ вара тунам йоча-влакым туныкташ тӱҥалеш, – каласыш тудо. Сандене шкендам аралыза.

Ю. Шамсутдинов.