Калтаса ужара
+17 °С
Пылан
Все новости
Новости
25 Сорла 2020, 23:00

Калтасасе коммунальщик-влак котельный ден шокшо да водоснабжений коммуникацийым олмыктат

Вашке теле толеш. Тудым ни пандемий, ни карантин, икманаш, нимоат да нигузеат чарен шогалтен огыт керт. Йӱштӧ лиеш.

Вашке теле толеш. Тудым ни пандемий, ни карантин, икманаш, нимоат да нигузеат чарен шогалтен огыт керт. Йӱштӧ лиеш.
Кызыт августыштак ме шижына, шокшо кече-влак утыр мемнан деч торлат, кечат кӱчыкемеш, а йӱдым утыр йӱштӧ лиеш. Меат шокшынрак чияш тыршена. Кеч-мыняре шокшын чиет гынат, пӧрт, пачер, школ, йочасад, офис ден эмлымверлаште шокшым огыт пу гын, садыгак йӱштӧ. А тидыже котельный-влакын пашашт деч шога. Сандене «Калтаса шокшо сеть» МУП-ын слесарь-ремонтник ден операторжо-влак ырыктыме сезон тӱҥалме деч ончычак шке озанлыкыштышт ревизийым эртарат, олмыктат, узел ден деталь-влакым ӱйлат, пуч-влакым вашталтат.
– 3 №-ан блочный котельныйыш каена, кызыт тушто эн сай оператор пашам ышта, – ик жап шоналтен каласыш Калтаса шокшо сеть» МУП-ын вуйлатышыже Виктор Иксанов, мыйын эн сай слесарь але операторым паша верыштыже войзаш йодмемлан.
Оператор Фарит Фахразиевым ме паша верыштыже верештна, тудо деталь ден узел-влакын пеҥгыдын пижыкталтмыштым терга ыле.
– Олмыктымо пашам тыште шуктымо, чыла насосын детальжым, вентиль-влакым терген лекна, – каласкала тудо. – Эше ик гана угыч чыла терген лекташ кӱлеш. Икманаш, котельный пашалан ямде улеш.
3 №-ан котельный Калтаса селасе Карл маркс уремын вич шуко пачеран пӧрт ден ик офис зданийым ырыкта. Тиде Фарит Тимирхановичын озанлыкше. Тиде тудын тӱҥ озанлыкше. Кӱлеш годым тудо рӱдӧ котельныйыштат оператор, слесарь семынат тырша. Тӱҥ шотышто кеҥежым, олмыктымо паша-влак мийыме годым. Райрӱдын коммуналь озанлыкыштыже Фахразиев коло ий утла тырша. Пытартыш вич ий – газ котельныйын оперторжо улеш.
– Ончыч селан кӱшыл ужашыштыже шуко пачеран пӧртлаште илыше калыкын пачерлаште телым йӱштӧ лийын, – шарнен ойла Фарит Тимирханович. – Шокшо, тӱҥ шотышто рӱдӧ котельный мӱндырнӧ верланымылан кӧра, ситен огыл. Ешартыш насос-влакымат шындаш тыршенна, но нимат полшен кертын огыл. Чыла йодышым теве тиде блочный котельный решатлыш. Тудым 5-6 ий ончыч чоҥымо. Кызыт калыкын шокшо шотышто мемнан деке йодышыжо уке.
Кызыт «Калтаса шокшо сеть» МУП-ын кум котельныйже уло: рӱдӧ да кок блочный.
– Олмыктымо паша чыла объектыштат шукталтеш, – каласкала Витор Альфритович. – Рӱдӧ котельныйште Григорий Садыков, Сергей Кугубаев ден Фаиль Шаймарданов тыршат. Олмыктымо пашам нуно пытареныт манаш лиеш. Ырыктыме сезон тӱҥалмылан котельный-влак 100% ямде лийыт. Нуным пашаш колтымо деч ончыч ме эше опрессовкым ыштена. Тудым олмыктымо шотышто кызыт Василий Ахмаевын бригадыже тырша. Вӱд пуч шотыштат нунак пашам шуктат. Шокшо сеть участкым Карл Маркс уремысе 41 №-ан пӧрт ончылно, вӱд пучым – Кооперативный, Пушкин, уремлаште уэмденыт, Советский уремыште пучым вашталташ кӱлеш. Тыгак запорный арматура шотышто ревизийым эртарена. Ырыктыме сезон тӱҥалме деч ончыч котельный оператор-влакым туныктен лукташ, профессийым палымышт шотышто экзаменым эртараш кӱлеш. Тиде гана тунеммашымат, экзаменымат Уфасе межрегиональный учебный рӱдер дистанционно эртараш тӱҥалеш. Чылалан коронавирус титакан. Кузе гынат тиде пашамат организоватлен колташ кӱлеш. Тунеммаш деч посна ме оператор-влакым пашашке налын огына керт, кеч нунын паша опытыштат кугу гынат.
Калтасасе коммунальник-влак телылан сай ямдылалтыт. Объект ден коммуникаций-влакым уэмденак шогат. Сандене йӱштӧ деч нуно мемнам аралат манын, ӱшаныме шуэш.
Ю. Шамсутдинов.