Районышто Россий флаг кече лӱмеш мероприятий-влак эртеныт

22 августышто мемнан кугу элна чапле кечым – Россий Федераций Кугыжаныш флагын кечыжым палемда. Ты пайрем деч ончыч Калтаса ден Краснохолмский селалаште «Ме чылан – Россий» лӱман акций эртен.

Райрӱдын чолга самырык еҥже-влак ты пайремлан лӱмдалтше велопробегым эртареныт. Тушто кажне тыланыше участвоватлен кертын. «Победа» кинотеатрын зданийже ончылно, тыште районысо самырык-влакын «штабышт» верланен, самырык велосипедист-влак чумыргеныт. Икшыве-влак «кӱртньӧ имньышкышт» россий триколорым пижыктеныт, вачышкышт флаг-влакым пыштеныт да фотографироватлалтыныт. Аквагрим деч поснак эртен огыл. Икманаш, вашлиялташ да мутланаш, чылан команде дене велосипед дене кошташ кумылло лийын.

Старт деч ончыч ГИБДД инспектор Татьяна Нурисламова икшыве-влак дене корно правил шотышто инструктажым эртарен. Велосипедист-влак стартоватленыт, палемдыме жапыште россий триколор кугешнышын лойгалтын. Акцийыште тӱҥ шотышто икшыве да самырык спортсмен-влак участвоватленыт. Маршрут «Центр» клуб гыч тӱҥалын селан рӱдӧ уремже дене спорт школ марте лийын, тидын годым нуным полицийын пашаеҥже-влак ужатен каеныт. Тыште велопробегын участникше-влаклан тӱрлӧ модмаш ден заданий-влак эртеныт. Тыгак сӱретлыме конкурс лийын, тыште икшыве-влак мел дене Россий Федерацийын флагшым сӱретленыт. Патриотический шӱлышыштӧ туныкташ манын, велопробегын участникше-влак Сеҥымаш паркыш пуралт лектыныт.

– Мыланна велопробег моткоч келшыш, – ик йӱк дене каласышт икшыве-влак. – Ме велосипед дене кудалышташ моткоч йӧратена. Эше модмаш ден конкурс-влакым эртарышт. Изирак пӧлек-влакым нална.

Пайрем акций флешмоб да райрӱдӧ Культура пӧртын артистше-влакын концертышт дене мучашлалте.

27 июльышто «Мои документы» шуко функциян рӱдерын пашаеҥже-влак шке профессиональ пайремыштым палемденыт. Ты пайрем кечын МФЦ-ын пашаеҥже-влакым Чап грамота дене палемденыт. Тиде Калтаса селаште пӧлка вуйлатыше О.А. Гайнцевам, тӱҥ специалист С.В. Суфияновнам, вӱдышӧ специалист Л.Л. Шадринам кумылаҥденыт. Тыгак мемнан элнан самырык гражданинже-влаклан паспортым кучыктымо пайрем лийын. Икымше документым Шайбакова Наталья Юрьевна ден Крлабаев Александр Владимирович налыныт. Тыгак тиде кечын шке наградыштым Всероссийский конкурсын участникше-влак налыныт.

«Салтаклан серыш. Сарын икшывыже-влак нерген» всероссийский конкурсын, а тудыжо Кугу Ачамланде сарыште Сеҥымашлан 75 ий теммылан лӱмдалтын лийын, региональ этапын финалистше-влак наградым налыныт. «Серыш» номинацийыште Краснохолмский школын тунемшыже Екатерина Андуганова сеҥен, «Сӱрет» номинацийыште – 1 №-ан Краснохолмский школ гыч Тимиргалиев Альмир.

Э. Мурсакаева.