Шыже толмо дене пакчаште могай сомылым шуктыман?

Йӱштӧ налме деч вара георгинын вургыжым пӱчса да пареҥгыдым лукса. Сайын мушса, марганцовко вӱдыштӧ 15-20 минут наре кучыза да, шӱмжӧ пеҥгыдеммеш, пычкемыш верыш пыштыза. Арня гыч пареҥгым шеледен пӧртйымак оптыза. Шекланыза, шеледыме годым кажне пареҥгыште ик пеледыш вурго кодшаш. Георгинын сортшым мондаш огыл манын, маркер дене вургышкыжо сортын лӱмжым возен кертыда.

Сентябрь мучаште пионын, флоксын, астильбын, ирисын лышташыштым мланде деч 15 сантиметр коден пӱчман. Вара 1 изи пане бордовский жидкостьым (1 процентан) 0,5 литр вӱд дене варыман да шавыман. Тыгаяк процедурым шошымат эртарыман. Тыге пеледыш ок шӱй.