Книга – эн сай пӧлек

Шинчымаш кечын икымше классыш тунемаш толшо чыла йочалан «Великая Победа» акцийым эртареныт.

Республикысе образований министерствын пресс-службыштыжо кузе увертареныт, Башкортостан Республике вуйлатыше Радий Хабировын инициативыже почеш, 1 сентябрьыште икымше классыш тунемаш толшо икшыве-влаклан «Великая Победа» акций эртен. Тудо Кугу Отечественный сарыште сеҥымашлан 75 ий теммылан лӱмдалтын лийын да йоча-шамычлан тыгаяк лӱман книгам пӧлекленыт.

Книга самырык лудшо-влаклан совет калыкын Кугу Отечественный сарыште сеҥымыже нерген каласкала. Тушко документ, фотосӱрет, почеламут, сар нерген шарнымаш-влакым пуртымо, тыгак книгаште Башкир АССР-ын Кугу Сеҥымашке могай надырым пыштымыж нерген пален налаш лиеш.

Тиде изданийым лӱмынак икымше классыш тунемаш кайыше йоча-шамычлан Башкортостан Республикысе образований ден науко министерстве ямдылен. Тудым Зайнаб Биишева лӱмеш «Китап» книга издательствыште савыктен лукмо.

С. Аркадьева.