Кокымшо тӱнямбал сар пытыме кечын Калтаса селаште Чап мемориал деке венок-влакым пыштеныт

Чап мемориал деке венок-влакым пыштымаште ветеран, «Центр» клубын волонтержо, райрӱдысӧ школ-влакын тунемшыже-влак участвоватленыт. Ик жап шып шоген нуно Кугу Отечественный сарыште колышо землякна-влакым шарналтеныт.

Венок-влакым пыштыме деч вара митингыште районысо ветеран-влак ушемын вуйлатышыже Ильчигулов Евгений Иликбаевич, район администраций вуйлатыше Садыров Юрий Минзарипович, педагогика пашан ветеранже, районын Почетан гражданинже Илтубаев Михаил Илтубаевич выступатленыт.

– Мемнан ачана, кочана да кугезе кочана-влак фашист Германий ден милитаристический Японийым кырен шалатымашке кугу надырым пыштеныт. Таче касвел эллаште нунын подвигыштым дискриминироватлыме шотышто политике эрта, но ме тидлан ваштареш шогышаш улына, сандене самырык тукым коклаште патриотический пашам намийыман, совет салтак-влакын подвигыштым мондыман огыл, вет нуно мыланна тыныс илышым конденыт, – ойлен Евгений Иликбаевич.– Совет Ушем сар жапыште 28 миллион еҥым йомдарен, тунамак США – 400 тӱжем еҥым, Великобританий – 370 тӱжем еҥым. Цифр-влакым таҥастараш неле. Кокымшо тӱнямбал сар куд ий шуйнен. Тудо Германийын Польшышко кержалт пурымыжо дене 1939 ий 1 сентябрьыште тӱҥалын да Японийын капитуляцийже дене 1945 ий 2 сентябьрыште пытен. Ты сарыш чылаже 61 эл ушнен.

Калыкын историйыштыже лийше ик эн кугу сар чылаже 55 миллион калыкын илышыжым кошартен, тушеч 28 миллионжо – совет калык.

Ме тидым шарнен илышаш да нигунамат мондышаш огынал.

Ю. Шамсутдинов.