сентябрь гыч районысо школлаште чылаже 3 тӱжем утла йоча шинчымашым погаш тӱҥалеш, 279 тунемше икымше гана парт коклашке шинчеш

1 №-ан Калтаса кыдалаш школышто икымше гана оҥгыр йӱк 63 тунемшылан йоҥгалтын.

Нунылан шинчымашым туныктышо-влак Юлия Владимировна Кагирова, Фаниса Хавиевна Магсумова ден Елена Анатольевна Иштубаева пуаш тӱҥалыт. Тений чылаже 1 №-ан Калтаса кыдалаш школышто 610 йоча тунемаш тӱҥалеш, 24 тунемше – 11 классыште.

Шинчымаш кечын, 1 сентябрьыште, у тунемме ийым йӱлашкак пурышо пайрем линейке дене почыныт да икымше оҥгырым пуэныт. Но тольык чыла огыл тунемше стройыш шогалын. Пайрем мероприятийыште лач икымше классыш тунемаш толшо ден индешымше да латикымше класслаште тунемше-влак гына участвоватленыт. Ончыч линейке изирак класслаште тунемше-влаклан лийын гын, вара выпускной класслаште тунемше-влаклан.

Икымше классыш тунемаш толшо-влакым школ директор Кутлубаева Наталья Рашидовна, район администраций вуйлатышын алмаштышыже Райна Габдылбариевна Идрисова, тӱҥалтыш класслаште туныктышо Фаниса Хавиевна Магсумова да МВД пӧлка вуйлатышын алмаштышыже Рустэм Ранифович Мамалимов саламленыт.

Икымше классыш тунемаш толшо йоча-влакым ача-ава лӱм дене Ирина Владимировна Карасева, а выпускник-влакым 11-ше классыште тунемше Анастасия Шамкаева саламленыт.

Икымше оҥгыр йӱк у тунемме ий тӱҥалме нерген увертарен. Тудым 1 «б» классыште тунемше Самира Шамсутдинова йоҥгалтарен.

Пайрем линейке 1 №-ан Калтаса кыдалаш школышто кӱчык формо дене эртен. У тунемме ий чыла лӱдыкшыдымылык мерым шотыш налын чоҥалташ тӱҥалеш.

Ю. Шамсутдинов.