«Транснефть – Урал» АО-то эн сай-влакым наградитленыт

Предприятийын кум пашаеҥжылан РФ энергетике министерстве деч «Сулло нефтяник» лӱмым элнан топливно-энергетический комплексышкыже изи огыл надырым пыштымыштлан да пашам тыршен ыштымыштлан пуымо.

Витле кум пашаеҥ «Транснефть – Урал» АО деч грамотым налын, эше 93 еҥым предприятийын Тауштымашыже дене палемденыт. «Транснефть системын ветеранже» лӱмым 21 еҥлан пуэныт – кажныже йӧратыме пашаштыже 20 ий утла тыршен да кӱкшӧ результатлашке шуын. «Отрасльын ветеранже-влакын поро йӱлаштым умбакыже шуйымыланда да коллектив сай паша результатышке шужо манын, чыла ышташ тыршымыланда, кугу таум каласем. Чыла тиде предприятийлан, регионлан да эллан у кӱкшытлашке шуаш йӧным ышта», – палемден Роман Ковалев.

Тиддеч посна коллективын лу еҥжын фотопортретыштым «Транснефть – Урал» АО-н почет оҥаштыже пижыктыме, эше витле еҥын портретшым – Башкирийысе, Челябинскысе, Курган областьысе филиал-влакын почет оҥашкыже пижыктыме.

Мероприятийыште коронавирус инфекций ынже шарле манын, чыла санитар-эпидемиологий йодмашым шуктен толмо. «Транснефть – Урал» АО-н филиалже-влакын пашаеҥышт-влаклан наградым паша верыштышт эртыше пайрем погынымашлаште кучыктеныт.