Башкирийыште чодыра пожарым йӧрташлан добровольный 54 дружиным ышташ шонат.

Башкирийыште «Экологий» нацпроект почеш «Лесной дозор на страже леса!» проектым илышыш шыҥдараш тӱҥалыныт. Образовательно-просветительский проект чодыра пожар-влакым йӧртымӧ шотышто добровольный дружине-влакым ыштыме нерген каласкала.

Кузе практике ончыкта, чодыра пожарым йӧрташ да кораҥдаш вий ок сите. Амал тӱрлӧ: тул пижме верыш нигузе да нимогай технике дене логалаш ок лий, пожар охранын пашаеҥже-влак огыт сите, окса укелык да молат.

Тиде кугу да кӱлешан пашам «Я ПАТРИОТ» организаций проектын партнержо-влак – Башкортостан Республикысе чодыра озанлык министерстве, Башкортостан Республикысе экологий ден природопользований министерстве да «Центр предупреждения и тушения лесных пожаров Республики Башкортостан» ГБУ дене пырля илышыш шыҥдараш тӱҥалеш.

Но тӱҥ, практике ужаш «Уфимский лесотехнический техникум» ГБПОУ-н базыштыже эрташ тӱҥалеш, тудак эше проектлан оксам ойыра.

Кузе БР-се «Я ПАТРИОТ» организацийын вуйлатышыже Зарипов Руслан ден Уфасе лесотехнический техникумын директоржо Динир Ахмедьянов палемденыт, нуно Президент Фондын эртарыме конкурсышто икымше гана участвоватленыт да сеҥеныт.

«Лесной дозор на страже леса!» проектын ик тӱҥ задачыже – йыр авырен шогышо средам арален кодаш – чодыра пожар-влак ваштареш кучедалмаш да нуным ончылгоч кораҥдымаш.

Проектын авторжо-влак республикысе кажне муниципалитетыште добровольный 54 дружиным ышташ да «Руководитель тушения лесных пожаров» ден «Тушение лесных пожаров» программе-влак почеш квалификацийым кӱкшемдыме курс-влакым эртараш темлат. Тыште чодыра озанлыкын специалистше-влак, добровольный пожар охранын членже-влак, школ лесничествын членже да студент-влак участвоватлен кертыт.

Спецкурс-влакым лесотехнический техникумын туныктышыжо, Башкортостан Республикысе чодыра озанлык министерствын вӱдышӧ специалистше-влак намияш тӱҥалыт.