Эртыше арнян Кугу Агытан ялыште Уремын пайремже эртен

Мемнан ял, мемнан урем, мемнан пӧрт… Кажне кечын ме нине шомаклам ойлена. А шоналташ гын, тушто шочмо кундем деке мыняр йӧратымаш, эртыше изи да кугу событий-влак нерген мыняр шарнымаш.

4 сентябрьыште Кугу Агытан ялыште Рӱдӧ уремын пайремжым эртареныт. Тений тиде уремым тӱзатеныт – гравийым оптеныт. Пайремым «Трезвое село» проект почеш эртарыме.

Урем калыкым, тыгак ял калыкымат пайрем дене район администраций вуйлатыше Ю.М. Садыров саламлен. Юрий Минзарипович яллан ончыкыжымат вияҥаш да ончыко каяш, а ял калыклан – тазалыкым, еш пиалым тыланен. Тыгак пайремыш погынышо калыкым Краснохолмский ялсовет администраций вуйлатыше С.В. Цедилкин саламлен.

Пайрем мероприятийыште 50 ий пырля илыше еш мужыр-влакым саламленыт. Тиде Раиса Исликаевна ден Василий Николаевич Тимиряевмыт, Михаил Иликбаевич ден Ольга Пастиевна Пахитовмыт, Надежда Сапиевна ден Виталий Алексеевич Егоровмыт. Уремын пайремыштыже тыгак эн шоҥго еҥ-влакымат – сар жапысе йоча-влакым – чапландареныт: Насталче Русиевна Зайнуллинам, Люция Сергеевна Гайнуллинам, Татьяна Тимировна Шангареевам, Милина Шашиевна Егоровам.

Яллан полышым ончыктен шогышо еҥ-влакымат ӧрдыжеш коден огытыл. Нунылан район администраций деч Тауштыме серыш-влакым кучыктымо. Тиде – ялын старостыжо Петр Зайнашевич Байрашев, Эльза Сергеевна Егорова да Генадий Николаевич Тимеряев.

Тыгак тыште эн сай оралте шотышто конкурсым иктешленыт. Тыште Инна Исаева, Алена Калямшина, Лариса Тоймурзина да Лира Лебедева сеҥеныт. Пайремым кидмастар Альбина Тарбияновна Игамбердина да пу гыч тӱрлӧ ӱзгарым ыштыше Георгий Петрович Зайдуллинын пашаже-влак сӧрастареныт.

А могай пайрем муро да куштымаш деч посна? Ял калык ден унамытым шке мурыжо-влак дене Генадий Тимеряев, ялысе культура пӧртын пашаеҥже-влак И.И.Исинбахтин, М.Ш. Егорова да «Марий кумыл» ансамбльын участникше-влак куандареныт.

А пайрем кугу ӱстел йыр пырля погынен чайым йӱмаш дене мучашлалтын.

С. Аркадьева.