Криминал хронике

7 гыч 14 сентябрь марте полицийыш осал пашам ыштыме нерген 74 увер пурен

Профилактике пашам намийыме годым адмправам пудыртымо 121, тидын годымак корнылаште коштмо правилым пудыртымо 101 фактым пален налме. Транспортым йӱшӧ вуя виктарыше 3 водительым кучымо, тонировкылан – 5. Полиций пашаеҥ-влак суртышто лийше проишествийыш 12 гана лектыныт. Шке кумылан калык дружине да ача-ава патруль дене пырля профилактике пашам намийыме годым адмправам пудыртымо 4 фактым пален налме.

Шолыштмаш-влак

Полиций пашаеҥ-влак пасу гыч ик рулон шудым шолыштмо фактым пален налыныт. Тиде осал пашам Ӱлыл Качмаш ялыште илыше 26 ияш пӧръеҥ ыштен. Тудым административно мут кучаш шогалтыме.

Полицийыш тыгак Краснохолмский села гыч пӧръеҥ йодмаш дене толын. Тудын мӧҥгыштӧ уке улмыж годым, май гыч сентябрь марте, палыдыме еҥ 5 кӱртньӧ меҥгым шолыштын. Тидын шотышто тергыме паша мия.

Пушеҥгым шкевуя руэт – закон почеш мутым кучаш тӱҥалат

«Чодыра» оперативно-профилактический мероприятийым эртарыме годым кугыжаныш автоинспекцийын пашаеҥже-влак Ӱлыл Качмаш ял воктене 5 кожым руымо фактым пален налыныт. Тыгай осал пашам Келтей ялыште илыше 35 ияш пӧръеҥ ыштен. Доследственный тергыме паша намиялтеш.

Шала коштшо вольык

Правам аралыше орган-влакын пашаеҥышт вольыкын шала коштмо фактым пален налыныт. Тиде – 1 ушкал ден 2 презе. Вольыкын озаже Тошто Калтаса ялыште илыше 83 ияш еҥ.

Арака порышко ок шукто

Калтаса селаште илыше 54 ияш йӱшӧ пӧръеҥ ик кевытыште ужалыше да полиций пашаеҥ дене вурседалын, шкенжым торжан кучен.

Правам пудыртышо еҥым административно мут кучаш шогалтеныт.

Калтаса селаште илыше 48 ияш пӧръеҥ туманлыме годым пуштмаш дене лӱдыктен, кӱзым лупшкедылын да 43 ияш шӱжарже ден тудын 66 ияш пырля илыше пӧръеҥжым сусыртен.

Тынбахте ялыште илыше 35 ияш пӧръеҥ кастене йӱшӧ вуя кӱзым лупшкедылын, ватыжым пиктен, пуштмаш дене лӱдыктен, тыгак пӧртым йӱлатем манын.

Кок факт почешат судебно-медицине экспертизым ышташ палемдыме, тергыме паша намиялтеш.

Калтаса районышто илыше пагалыме калык ден унамыт! Осал пашам ыштыме фактым пален налында гын, 4-25-81 номер дене йыҥгырташ йодына.

Т. Нурисламова.