Ӱлыл Тиктем ялыште Культура пӧртым олмыктеныт

Ял калык «Поддержка местных инициатив» программе почеш культура учрежденийым олмыкташ темлен.

Кеч-могай ялыште, селаште Культура пӧрт але клуб – ик эн кӱлешан учреждений. Тиде калык погынымо вер, культура илышын рӱдерже, тыште еҥ-влак творчестве вияҥеш да у шӱдыр-влак «чӱкталтыт». Паша да озанлыкыште сомылым шуктымо деч вара улыжат тышке – клубыш – еҥ-влак вашкат. Иктышт – репетицийыш да кружокыш, молышт – концертым ончаш, шӱм-чон дене каналташ, талантан земляк-влаклан куанаш.

Ӱлыл Тиктем ялыштат Культура пӧрт уло. Но тудо пыташ тӱҥалын… Уке йоҥылыш ида умыла, тыште культура илыш шолеш, Культура пӧрт пелен «Шонанпыл» ӱдырамаш-влак муро ансамбль да «Соловушки» йоча коллектив, «Маски» йоча театр пашам ыштат. А теве зданийже чот тоштемын, тыште волгыдо огыл, пычкемыш, йӱштӧ, икманаш моткоч шӱлыкан. Пытартыш жапыште чыла мероприятий зрительный залыште огыл, а фойеште эртен. ДК-ын директоржо Любовь Ахметгариеван мутшо почеш, ты зданий тудым ыштыме деч вара ик ганат олмыкталтын огыл. Тугеже 50 ий наре. Косметический пашам эртарыме, кушто чиялтыме, ошемдыме, жапыштыже леведышымат олмыктеныт, а теве капитальный ремонт икганат лийын огыл. Кунам Ӱлыл Тиктем ял калыклан «Поддержка местных инициатив» программыште участвоватлаш темленыт, нуно чумыр погынымаште Культура пӧртым капитально олмыкташ лийыныт.

«Поддержка местных инициатив» программе кугыжаныш полышын моло программыж деч ойыртемалтеш. Тыште калык могай пашам шукташ кӱлмӧ нерген шке ойырен налеш, тыгак ойырен налме проектым илышыш шыҥдараш оксам пога. Ты проект конкурс отборым эртен, олмыктымо пашам эртараш республике бюджет оксам ойырен, а вес ужашыжым – верысе бюджет, а ситыдыме моло оксам ял калык деч погеныт. Тыште инициативный группа пашам ыштен. Нуно ял калык, ӧрдыжтӧ илыше земляк-влак дене кутыреныт, оксам чумыреныт. Йӱклышӧ-влаклан район Советын депутатше Азат Галлямутдинович Габдрахманов полшен. Тудо ситыдыме оксам ойырен. Конкурсный торгайымаш эртен, подрядчик палемдалтын, Культура пӧртым уэмдыме паша тӱҥалын.

Февраль гыч июль марте олмыктымо паша миен. Тошто пу тӧрзам кызытсе жалан келшен толшо пластиклан вашталтеныт, пӧлем кӧргыштӧ мотор у омсам вераҥденыт. Чыла электропроводкым, ырыктыме системым вашталтеныт. Тошто пуч-влак гыч спортплощадкыште футбол дене модаш воротам ыштеныт. Штукатурно-чиялтыме пашам эртареныт.

Олмыктымо пашам Азат Галлямутдинович шке текшырен, пашам ыштыме бригаде деч чыла сай ышташ йодын, кӱлшӧ каҥашым пуэн. Результатше куандарыше – Культура пӧрт у, мотор, волгыдо да ындыжым тушто шокшо лиеш.

7 сентябрьыште Культура пӧртым пайрем шӱлышыштӧ почыныт. Тушто Калтаса район МР Совет вуйлатыше А.Г. Габдрахманов, районысо Культура пӧлка вуйлатыше З.Т. Шамсутдинова, район Советын секретарьже И.Р. Кононова, «Икоян Россий партий МИК-ын секретарьже З.В. Максимова лийыныт.

Калык ончылно ойлышыла, нуно «Поддержка местных инициатив» программыште участвоватлаш кӱлмӧ нерген палемденыт. Ты программе еҥ-влакын илышыштым саемден колташ полшат. А Г. Габдрахманов Ӱлыл Тиктем ял калык ончыкыжымат у проектлаште участвоватлаш тӱҥалеш манын ӱшанен каласен. Тыгак клубышто кастене «тул ынже йӧрнӧ», тӱрлӧ мероприятий, кружок-влак пашам ыштышт манын палемден. Мероприятий-влакым эртараш З.Т. Шамсутдинова аппаратурым налын пуаш полшена манын каласен. Инициативный группын пашажым Тауштымаш дене палемдыме.

Клубым почмо программе концерт дене шуйныш. Уэмдыме Культура пӧртыштӧ «Шонанпыл» верысе мурышо ансамбль, «Восходящие звездочки» йоча куштышо коллектив (Кӱшыл Тиктем СДК), «Умыр кас» фольклор ансамбль (Кугу Келтей СДК), «Молодушки» мурышо ансамбль (Кӧтерем СДК) выступатленыт.

Сценыште концерт мийыме годым, залыш еҥ-влак погыненыт. Ты событий чылт кугу пайремыш савырнен. Тек тыгай пайрем-влак шукырак лийышт.

И.И. Кононова: – Калтаса районышто «Поддержка местных инициатив» программе ныл ий пашам ышта. Ты жапыште шуко ышталтын: корным, клубым олмыктымо, обелиск ден шӱгарлам тӱзатыме, йоча да спорт площадке-влакым вераҥдыме. 2020 ийыште Калтаса районышто конкурсный отборым сай эртымеке, ныл проект илышыш шыҥдаралтеш: Кокла Качмаш да Кӧгерчен яллаште уремыш шаргӱм оптеныт, Тошто Калтаса ялыште Кугу Отечественный сарын участникше-влаклан обелискым тӱзатеныт да У Яш ялыште йоча площадкым вераҥденыт.

С. Аркадьева.