Образований

Районысо школ ден йочасадлаште Калык костюм кече эртен

11 сентябрьыште Башкортостаныште Калык костюм кече эртен. Кузе районысо образований пӧлка увертара, 26 тунемме учрежденийлаште: 15 школ, 10 йочсад да ешартыш шинчымашым пуышо ик учрежденийыште тидын дене кылдалтше т¢рлӧ мероприятий эртен.

Чыла мероприятий тӱрлӧ формат дене эртен: класс шагат, мастер-класс, виртуальный экскурсий, краеведений музейыш экскурсий, дискуссий, выставке да молат.

17 школын коллективше «Учусь в национальном костюме», «Работаю в национальном костюме» флешмобышто участвоватлен. Тунемше ден туныктышо-влак калык костюм дене фотосӱретыштым социальный сетьлаште чулымын вераҥденыт.

Чыла тиде йоча-шамычым калык йӱла деке лишемда, калык костюмым пагалаш да калык культурым вияҥдаш таратен шога.

С. Аркадьева.