Погынымаш

Район администрацийыште санитарно-противоэпидемический комиссийын погынымашыже эртен.

Тыште район калыкын тазалыкшым арален кодымо шотышто йодыш-влакым ончымо.

Тыште икмыняр кӱлешан теме-влакым лончыленыт. Тиде – ОРВИ ден грипп шотышто профилактике, внебольничный пневмоний да коронавирус инфекций дене черланымаш.

Кузе БР-се Роспотребнадзорын Нефтекамскысе территориаль пӧлка управленийын специалист-экспертше Л.В. Ахмадуллина каласыш, кандаш тылзе жапыште районышто ОРВИ дене черланымаш 26 процентлан кугемын, 130 еҥ внебольничный пневмония дене черланен.

Тыгак районышто гемморагический лихорадке дене черланыше-влак шукемыныт. Кодший ты жаплан тиде чер дене 2 еҥ черланен гын, тений – 6.

Янлык пурылмо случай-влак тыгак шукемыныт. Тений тыгай 69 случайым палемдыме.

Погынымаште моло йодыш-влакымат ончымо.