Грипп деч шкем кузе аралаш?

Мо тугай грипп?

Грипп – инфекциян чер, тудо кажне айдемылан пижын кертеш. Грипп чер вируслан кӧра «ылыжеш», юж дене черле еҥ деч кусна.

Грипп годым организмысе хронический чер-влак вияҥыт. Тыгодым айдеме тӱрлӧ нелылык дене тӱкнен кертеш:

шодо чер (пневмоний, бронхит). Грипп годым айдеме пневмонийлан кӧра колен кертеш;

шӱлымӧ да ЛОР-органласе хронический чер (отит, синусит, ринит, трахеит);

шӱм да вӱргорно нелылык (миокардит, перикардит);

нерв системысе нелылык (менингит, менингоэнцефалит, энцефалит, невралгий, полирадикулоневрит-влак).

Нине чер-влак организмлан нелылыкым ынышт лук манын, грипп ваштареш профилактикым жапыштыже эртарыман да чын эмлалтман.

Грипп шижде пижеш. А ден В вирусан гриппын возбудительже-влак пеш вашке пижыт. Организмыште, икмыняр шагат гыч шӱлымӧ орган-влакын тазыла чорашт пужла, да тушко бактерий-влак логалыт.

Черланымек, мом ыштыман?

Грипп деч шке гыч эмлалтман огыл, вигак врач деке кайыман. Черле икшывым йочасадыш, школыш але иктаж-могай мероприятийыш колтыман огыл. Грипп годым кийыман – организмын шӱм да вӱргорно системылан нагрузко кугемеш. Врач диагностикым шындышаш да ийготлан келшыше эмым пуышаш, тудын чыла кӱштымыжым шуктыман. Черле еҥлан вӱдым шуко йӱман.

Палыза!

Температура 38-39 градус марте кӱзен гын, участковый врачым але «вашке полыш» бригадым ӱжыктыман.

Кокырымо да тӱрвычмӧ годым умшам да нерым нершовыч дене петырыман.

Черле еҥ уло гын, пӧлемыш яндар южым жапын-жапын пуртыман, дезинфицироватлыме средства дене кӱварым мушман.

Черле еҥ деке мийыме годым медицинский маскым чийыман.

Кузе аралалташ?

Грипп деч аралыше эн сай йӧн – вакцинаций.

Организмыш вакцине логалме дене айдеме ок черлане. Вакцине антитела-влакым луктеш да иммунный системым инфекций дене кучедалаш тарата. Моло медицине препарат деч, мутлан, иммуномодулятор, витамин, «калык медицине» средство-влак деч вакцинын полышыжо моткоч кугу.

Прививкым чылалан ышташ темлат. Поснак – хронический черан еҥ, мӱшкыран ӱдырамаш-влаклан да профессиональный риск группыш пурышо еҥ-влаклан.

Гриппын симптомжо-влак – температур 37,5 – 39 градус марте кӱза, вуй, чогашыл, йыжыҥ-влак корштат, чытырыкта, ӱнар йомеш, кокырыкта, нер йога, логар коршта.