Кӧкыш ял культура пӧрт коллективын шонымашыже шукталтын – нунылан сай музыкальный аппаратурым пӧлекленыт

Мо тугай ялысе культура пӧрт? Тиде ялын шӱм-чонжо, тудын илышыжым ончыктен шога. Таче гын, ялысе клубыш калык каналташ, ик жаплан сурт кӧргысӧ сомылым мондаш, толеш.

Кӧкыш ялысе культура пӧрт ялын рӱдыштыжӧ верланен. Тыште тӱрлӧ погынымаш, пайрем, У ий мероприятий-влак эртат. Ий гыч ийыш мемнан клубна сылнешт толеш: пӧртвуйым, тӧрза ден омсам вашталтыме, клуб кӧргыштӧ пырдыж, кӱвароҥа-влакым уэмдыме. Тыште ынде шокшо, илышыш у план ден шонымаш-влакым пурташ чыла йӧнат уло.

Мемнан коллективын шонымашыже ыле: кызытсе жаплан келшен толшо музыкальный оборудованийым налаш.

«Единый Россий» партийын «Реальные дела» проектше мыланна шонымашнам шукташ полшыш – звуковой ден технический оборудованийым нална.

Техникын пашам кузерак ыштымыжым тергаш да коллектив ден ял калыкым саламлаш Калтаса район МР Советын депутатше А.Г. Габдрахманов, партийын верысе пӧлкажын исполнительный секретарьже З. В. Максимова да район Советын секретарьже И.Р. Кононова толыныт.

– Кӧкыш ял культура пӧрт районышто эртарыме чыла мероприятий ден конкурслаште участвоватла. Тиде культура рӱдер, вашлиймаш вер, творческий план-влакым илышыш шыҥдарымаш. «Реальные дела» проект почеш налме оборудований кӱкшӧ уровеньыште коллективын да ял калыкын творческий шонымашыже-влакым илышыш шыҥдараш полша манын, ӱшаныме шуэш, – каласыш А.Г. Габдрахманов да СДК коллективлан проектын участникше табличкым кучыктыш.

Унамытым да ял калыкым «Вис-вис» мурышо ансамбль куандарен.

Мемнан СДК конкурсышко логалмыжлан да музыкальный технический оборудованийым налмыжлан куанен огына шукто. Тиде проектор мыланна оҥай да сылне презентаций-влакым гына огыл, тыгак «Культура. РФ» порталыште ончыктымо виртуальный концерт-влакымат ончаш полша.

Кӧкыш ял СДК-ын коллективше.