Мемнан спортсменна-влакын сеҥымашышт куандара

Калмиямучаш ял гыч Валентин Михайлов Россий чемпионатын суперспринтын финалыштыже сеҥен

Кӧлан дыр Валек, кӧлан дыр Валентин, а район калык тудым Валентин Михайлов семын пала. Тиде рвезе спортышто икымше ошкылым шымше классыште тунеммыж годым ыштен. Калтаса ДЮСШ-ан воспитанникше. Тудын нерген тренер Евгений Ахметдинов тыгерак ойла: «Весела, поро. Кеч-кунамат рвезе ден ӱдыр-влаклан полшаш ямде: то йолчиемым чияш полша, то ечым нумалеш… ».

Евгений Николаевичын мутшо почеш, Калтаса спортшколыш Валентин ямде спортсмен лийын толын. А спортым йӧраташ тудлан негызым икымше тренерже Феликс Марданов – пыштен. палемдаш кӱлеш, Мардановын шуко воспитанникше спортышто шкеныштым муыныт. Таче гын, ме Валентин нерген ойлаш тӱҥалына. Шукерте огыл тудо кеҥежымсе биатлон дене Россий чемпионатын суперспринтшын финалыштыже сеҥен.

Таҥасымаш-влак август мучаште Ярославль областьысе Рыбинск олаште эртеныт. Тыште мемнан геройна кум кече ончыл вер верч кучедалын. Кучедалмыже арам лийын огыл. Турнирын икымше кечыштыжак Валентин 5 километрыш куржмаште икымше толын.

– Прологым эртымем годым кум штрафной кругым эртенам. А финалыште гын, ик промах дене эн сай результатым ончыктенам.

Тудын мутшо почеш, Рыбинскыште трассе куштылго огыл. туге гынат, тиде таҥасымашлаште Валентин ончыл верыш логалын. Спринтыште тудо кокымшо лийын, масстартыште – кумшо…

– Мый куаненам, – каласкала спортсмен. – Кажне спортсменлан сеҥаш моткоч кумылло. Мыят нунын коклаште улам. Медальым нальым. Икымше минутышто куанымаш, нойымаш – чыла иктыш ушалтын.

Кузе ме возенна ыле, Валентин Михайлов спорт дене кылым шымше классыште тунемыж годым кучаш тӱҥалын, тунам тудлан латкум ий лийын.

– Ту жапыште школышто спортсмен-влак шуко ыльыч, - шарнен ойла Михайловын икымше тренерже Феликс Марданов. – Школын сборный командышкыже логалаш тунам конкуренций кугу лийын. Валентин изиж годымак тыршышан лийын. Тренировкылам нигунамат коден огыл. Конешне, кӧ тренироватлалтеш, лач тудо веле сеҥымашке шуэш. Мыйын гын задачем - тыгай рвезе-влакым муаш, нуным тренироватлаш тӱҥалаш да сеҥымашлан, результатлан таратен шогаш.

Таче ме ужына, тренерын шындыме задачыже шукталтын. Валентин Михайлов – Российын чемпионжо. Чыланат – йолташыже, родо-шочшыжо, тренерже, ял калык – тудын сеҥымашыжлан куанат. Меат нунын дене тиде куанымашым пайлена. Тек тиде сеҥымаш мемнан землякналан кугу кӱкшытлашке кӱзымаште тӱҥалтыш веле лиеш.

О. Айгильдина.