Эн тӱҥжӧ – йоча-влакын тазалыкышт

Уфа олаште йоча-влакын корнышто эмганымашыштым ончылгоч кораҥдыме шотышто республике семинар эртен.

Образований пӧлка кузе увертара, 17 сентябрьыште Уфасе автотранспортный колледжыште «Безопасность дорожного движения в Республике Башкортостан» региональ проектым илышыш шыҥдараш манын, образований организацийлаште йоча-влакын корнышто эмганымашыштым ончылгоч кораҥдыме пашам организоватлымаш» лӱман республике семинар эртен.

Образований министерствын да Башкортостан Республике ГИБДД управленийын пашаеҥже-влак йоча-влакын корнылаште шкем кузе кучаш кӱлмӧ нерген правил-влакым туныктымо шотышто паша нерген ойленыт. Шке паша усталыкышт дене Уфа да Нефтекамск ола гыч специалист-влак пайдаланалтыныт.

Тылеч посна, «Безопасное колесо» самырык инспектор-влак толкынын отрядше-влак коклаште республике конкурсым иктешленыт да сеҥыше ден призер-влакым палемденыт. 3 №-ан Краснохолмский кыдалаш школын «Светофор» командыже грамота-влакым налын: безопасность жизнедеятельности основым сай палымылан 1-ше вер; командный зачетыште 3-шо вер, участвоватлымылан грамотым кучыктымо. Тыгак командын кажне участникшым диплом да шарнымаш пӧлек дене палемденыт.

С. Аркадьева.