Селанам тополь ден пызле сӧрастараш тӱҥалыт

«Ужар Башкирий» республике акций дене келшышын, Калтаса селаште пушеҥге-влакым шындыме шотышто субботник эртен.

50 пызле, лу утла пиште да 75 пирамидальный топольым селан территорийыштыже субботникын участникше-влак шынденыт. Пытартыш жапыште тиде райрӱдым ужартыме шотышто кокымшо кугу акций. Икымшыжым эртыше ийын эртарыме лийын, тунам райрӱдыштӧ кож ден пызлым шынденыт. Тений пушеҥге-влакым рӱдын ик эн кугу оралтыштыже да села гыч лекмаште касвелыштыла шынденыт.

Калтаса селаште Карл Маркс да Горький урем-влак ушнымаште оралте чынжымак ик эн кугу. Тудын деке Карл Маркс уремысе шуко пачеран ныл пӧрт, Горький уремысе кок пӧрт да Ленин уремысе шуко пачеран ик пӧрт ушнат. Тений тиде оралте «Башкирский дворики» оралте территорийым тӱзатыме республике программылан кӧра моторланен да уэмдалтын. Оралтыш пурымо корныш, йолешкыш асфальтым шарыме, подъезд-влак ончылно теҥгыл-влакым вераҥдыме, автомашиналан парковкым, вургемым коштымо площадке-влакым ыштыме. А эн тӱҥжӧ – йоча-влаклан тӱрлӧ аттракцион да пушкыдо резинке покрытий дене модмо кугу площадкым ыштыме. Тышке йыр улшо шуко пачеран пӧртла гыч тӱрлӧ ийготан йоча-шамыч модаш погынат, тыгак пӧртла гычат икшыве-влак толыт.

Оралте палаш лийдымын вашталтын, тудо ындыжым мотор да функионально поян улеш манын, каласаш лиеш. Улыжат ик штрих гына ок сите – ужартыме паша.

Клумбо-влакым ышташ мландым кондымо – шошым пеледышым шындат, кушто кӱлеш, газон шудым ӱдат. Оралтын территорийже кугу, тыште пушеҥгымат шындаш вер уло. Тудым пызле да пиште аллей дене сӧрастараш лийыныт. Нунын шындымаште «УЖХ» ООО, райрӱдӧ Культура пӧрт, «Центр» клубын пашаеҥже-влак Калтаса школ гыч волонтер-влак дене шынденыт. Районысо сценын солистше-влак Кристина Русиева, Ирина Карасева, Виктор Ванюшкин да Ольга Алкаева субботникын участникше-влаклан шке мурыштым пӧлекленыт, пайрем кумылым пуртеныт. Тыгак ты пӧртлаште илыше калык чолган участвоватлен. Ялсовет вуйлатыше Руслан Кутлубаев нуным ончаш, вӱдым шаваш шӱден. А ты кечын шындыме пушеҥгылан вӱдым пожар частьын пашаеҥже-влак шавеныт.

50 вондо пызлым да шым пиштым субботникын участникше-влак оралте территорийыште шынденыт. Кызытак нуно оралтым сӧрастарат, а ик-кок ий гыч, кунам вондер ден пушеҥге-влак кугем шуыт, моткоч сӧрал лиеш. Пызле-влак шошым ош тӱсан мотор пеледышышт дене калыкым куандарат, а шыжым – ояр да йошкар пызлыгичкышт дене.

Тиде кечынак Калтасаште селаште автозаправочный станций гыч тӱҥалын Карл Маркс урем марте пирамидальный тополь-влакым шынденыт. Шымле вич топольым шынденыт, ты аллей Кугу Отечественный сарыште Сеҥымашын 75-ше идалыкшылан лӱмдалтын. Тыште субботникыште районысо да верысе ялсовет администраций, ИКЦ, РДК, самырык гвардийын «Икоян Росси» партийже участвоватлен.

Шындыме пушеҥге, аллей-влак мемнан райрӱдынам ончыкыжым сӧрастараш тӱҥалыт. Тыгак тӱзатыме урем да оралте-влакат. Эртыше субботникын участникше-влак икмыняр ий гыч ты кӱкшӧ тополь да пызле вондер-влак кокла гыч шкеныштын кидышт дене шындыме пушеҥгыштым кычалаш тӱҥалыт. Тидым мый молан возем, вет кажне еҥ шке илышыштыже кеч ик пушеҥгым шындышаш.

Ю. Шамсутдинов.