Чын туныктышо

Чын туныктышо лияш - тиде кугу талант, усталык! Вет тудо шке опытшым да шинчымашыжым йоча-влаклан пуэн моштышаш. Тунемше илышыште шке корныжым муэш гын, очыни, тиде туныктышылан кугу лектыш. А эн кугу куанже – Тунемше-влакын тау мутышт.

Мыйын икымше туныктышем Валиева Ирина Раяновна. Кеч ятыр жап эртен, школым пытарымемлан коло ият шуын, а икымше туныктышем садак ушыштем да шӱмыштем. Таче, мый Ирина Раяновналан тау мутым каласынем. Вет тудо шке вийжым да жапшым чаманыде, мыланна, изи йоча-влаклан, моштен шинчымашым пуэн. Мутат уке, тиде шинчымашна эреак илышыштына кӱлеш лийын.

Мемнам лудаш, возаш да шотлаш туныкташ Ирина Раяновна мыняр вийым да чоным пыштен, тидым лач тудо гына пала. Кажне урокшо шот дене миен, школысо программым изи ньога-влаклан раш умыландарен моштен. Кызытат шарнем, кузе музыка урокышто баян дене мастарын тӱрлӧ семым луктын, труд урокышто тӱрлаш да пидаш, тыгак икте-весе коклаште кылым кучаш, йолташлан полыш кидым пуаш да кугыракым пагалаш туныктен.

Шуко жап эртымекат, ме икымше туныктышынам – Ирина Валиевам - поро да шокшо мут дене гына шарнена.

Ирина Раяновна, саламлена тендам Туныктышын кечыж дене! Таза лийза, тӱҥалме сомылда ушныжо, мом шонен пыштенда, тек чыла шукталтеш. Пагалена да йӧратена!

Крлабаева Елена.