Призваний – туныкташ

Мемнан илышыштына туныктышо могай кугу рольым модеш? Тидын нерген иктаж гана шоналтенда мо? Туныктышылан кажне икшывым туныкташ, кугеммекышт чын айдеме лийышт манын, мыняр вий, чытымаш, шӱм-чон кӱлыт.

Таче ме чапле айдеме, школлан илышыжын 36 ийжым пуышо, Кугу буква гыч туныктышо, шке тунемшыже-влакын йӧратымашыштым да пагалымашым сулен налше Ишкуатова Людмила Никитична нерген ойлынена.

Тӱняште нимо арам ок лий, ты кугу мландыште илыше кажне айдемын пӱралтмашыже уло. Людмила Никитичналан куштылго огыл туныктышын пашаже пӱралтын. 1986 ийыште тудо Калтаса кыдалаш школышто пашам ышташ тӱҥалын.

Ятыр ий школ администраций тудлан тыглай огыл класс-влакым ӱшанен пуа. Нигӧ ок ӧр, Людмила Никитична чыла пашамат сай шукта. Тудо туге шке пашажым ышта да икшыве-влакым кумылаҥда – чыла коллектив дене келшен илат, тунеммаште икте-весыштлан полшат. Икшыве-влак палат: туныктышо нигӧм обижатлаш ок пу, эре полша, ты жапыштак пеҥгыдын йодеш. Тудо кажне тунемше деке, кеч тудо уда да неле койышан гынат, корным муын мошта. Шке тунемшыже-влаклан уло шӱм-чон шокшыжым, вийжым пуа.

Шке пашажым сай пала. Кӱкшӧ профессионал улмыжлан, школ вуйлатыше Людмила Никитичнам тӱҥалтыш школышто туныктымо-воспитатлыме паша шотышто директорын алмаштышыжлан шогалтат. 2009 ий гыч – школышто тӱҥалтыш профушем организацийын вуйлатышыже. Теве 18 ий школышто тазартыме лагерьым вуйлата.

Икшыве-влакым туныктымаште да воспитатлымаште сеҥымашлашке шуымыжлан, Людмила Никитичнам образований пӧлкан да район администрацийын, Башкортостан Республике образований министерствын Чап грамотыжо, Россий Федераций калык образований да наука пашаеҥ-влак профушемын Башкир республике организацийын президиумжын грамотыжо дене палемдалтын.

Пагалыме Людмила Никитична! Ты юбилей ийын да Туныктышо-влакын кечышт деч ончыч Тыланда пеҥгыде тазалыкым, кужу ўмырым, еш илышыштыда ласкалыкым, порылыкым, тичмаш киндерке гай пиалым тыланена. Тек эре тыгаяк тымалте, тунемше-влакымшўм йўлен йӧратыше, нунын верч тыршыше лийын кодса.

1 №-ан Калтаса кыдалаш школын коллективше.