Икымше туныктышо нерген

Кажнына шкенжын икымше туныктышыжым, школышто тунемме жапым шарна. Эртыше курымын 50-ше ийла тўҥалтыште Калмиямучаш тўҥалтыш школыш у туныктышо Дедюхин Николай Тихоновичым колтеныт. Тудо Удмурт АССР Каракулинский район гыч лийын.

Николо-Березовский педагогический техникумышто тунемме деч вара Ӱлыл Тиктем тўҥалтыш школышто туныктен. Мемнан деке школыш колтымо деч ончыч Калтаса йоча пӧртыштӧ пашам ыштен. Туныктышын ешыжлан илаш школышто изирак пӧлемым ойыреныт. Школ тунам Чапаев уремыште верланен лийын. Тыште кок тунемме класс, кажныштыже иканаште 1,3 да 2,4 класслаште тунемше-влак шинчымашым погеныт. Николай Тихонович гармоньым устан шоктен. Сандене икшыве-влакын тудын аккомпанементше дене музыка урок-влак поснак шарнымашеш кодын. Тыгак ий еда тунемме ий пытыме деч вара, Танып эҥер воктеке поход дене лекмаш, касаткинский чодыраште шындыме пушеҥге-влак коклаште шўкшудым сомылымаш, пайремлаште клубышто концертым шындымаш шарнымашеш кодыныт. Мемнан туныктышына урок-влак деч вара художественный литературым лудмо шагатым эртарен. Ме кумыл шуын В. Катаевын «Сын полка» повестьше гыч изи Ваня Солнцевын, В. Короленкон «Слепой музыкант» повестьше гыч самырык Эвелина ден Петрын келшымаш да йӧратымаш историйжым шўм вургыжын лудынна да колыштынна.

Николай Тихоновичын педагогика биографийжын кугу ужашыже Калмиямучаш ял гыч икшыве-влакым туныктымылан лўмдалтын. Тыште тудо ватыже Полина Архиповна дене илыш корныштым мучашленыт. Ме, тудын тунемшыже-влак, икымше туныктышына Дедюхин Николай Тихоновичым порын шарнен илаш тўҥалына.

Ты фотосўретыште 1-4 класслаште тунемше ўдыр ден эрге-влак, 1958-59 тунемме ийлаште Калмиямучаш тўҥалтыш школын пашаеҥже-влак. Тунемше-влак коклаште ты строкан авторжо, 2-шо классыште тунемше.

Р. Шакиртов, Россий Федераций просвещенийын отличникше.