Шочмо кундемым йӧраташ туныкта

Залифа Муратовна нерген кугу руш классик А.П. Чеховын мутшо дене каласаш лиеш: «Туныктышо артист, художник, шке пашажым чот йӧратыше еҥ лийшаш». Тудо шкеже Абзелил районышто шочын, распределений почеш самырык специалистым Калтаса районыш колтеныт да тыште тудо шке пашажым сай палыше специалист, сай ава ден кова лийын. Ушан туныктышо семын, Залифа Муратовна йоча-шамычым башкир йылме ден литертурым, культурым, йӱлам йӧраташ таратен мошта.

Тунемше-влак башкир йылме дене серен да лудын моштышаш улыт, лач тыге веле нуно башкир писатель ден поэт-влакын сылнымут поянлыкышт дене палыме лийын кертыт. Тыгак нуно башкир йылме дене лекше газет ден журнал-влакым лудшаш, телевидений дене оҥай передаче, спектакль- влакым ончышаш да умылышаш улыт.

Туныктышо тунемше-влак дене пырля шочмо кундемын историйжым, ешын тукымвожшым шымла да шэжэрэм ышта, башкир эстарадын шӱдыржӧ, палыме кураист-влакын концертышкышт коштеш, спектакльлаште чӱчкыдын лиеда.

Залифа Муратовнан тунемшыже-влак «Здравствуй, здравствуй, сказка» башкир йылме дене эртыше район конкурсышто, «Урал батыр» эпосым каласкалымаште район конкурсышто, «Пою мою республику» сочинений дене республиканский конкурсышто участвоватлат да сеҥат. Туныктышо шкежат тӱрлӧ конкурслаште участвоватла. Туныктышо-влак коклаште «Живая классика» почеламутым лудшо-влак коклаште финалыш лектын, башкир йылме дене тӱнямбал диктантын организаторжо-влак гыч иктыже улеш да БСТ каналысе «Салям» передачыште мемнан районын чапшым арален, «Единая Россия» партийын верысе пӧлкажын вуйлатышыже да «Женищина – мать нации» республиканский конкурсын лауреатше.

Тунемше-влак уло кумылын башкир йылме дене почеламутым лудыт, руш ӱдыр башкир калык костюмым чиен сценыште кушта, татар ӱдыр почеламутым лудшо-влак коклаште район конкурсышто башкир йылме дене почеламутым ойла да призер лиеш – чыла тиде туныктышылан кугу пиал. Тугеже туныктышын урокшо-влак арам огыт эрте да тунемшын чоныштыжо кышам кодат, башкир йылме, калык, тудын историйжым, йӱлажым, культурыжым йӧраташ да пагалаш таратат.

Туныктышын тунемше-влак деке влиянийже кугу да ӧрыктарыше. Таче тудо урокышко кая, а эрла обществын, элнан, тӱнян эрласе тӱсшым формироватла, вет таче тудын тунемшыже-влак парт коклатше шинчат, а эрла нуно элнам вуйлаташ, наукышто открытий-влакым ышташ, шочмо элыштым тушман деч аралаш т ҥалыт. Да кажныжын ваче шеҥгелныже тудын туныктышыжо шогаш да поро пашалан тараташ тӱҥалеш.

Поро да шокшо мутым Залифа Муратовналан выпускник-влак ойлат: «Залифа Муратовна шке пашажым моткоч чот йӧрата. Лач Тендан тыршымыланда кӧра ме шкенан вийнам башкир йылме дене Всероссийский олипиадыште тергышна да башкир гимназий, лицейлаште тунемше-влак дене пырля таҥасышна да начар огыл шинчымашым ончыктышна. Опытланда, Тыланда, кугу тау!» – Алсу Салихова, Бирск оласе кооперативный техникумын студенткыже.

«Мыланем Залифа Муратовнан тунемшыже лияш пиал шыргыжалын. Тудын вуйлатымыже почеш ик гана веле огыл башкир йылме дене сочинений, почеламутым лудмаш район конкурслаште участвоватленам да ик гана веле огыл призер лийынам. Таза лийза, тек илышыштыда чыла сай гына лиеш», – Регина Зиатдинова, Уфа оласе БГУ-н студенткыже.

Шерге Залифа Муратовна, Тендам юбилейда да Тункытышын кечыж дене алал кумылын саламлена.

Тыланена порсын ярым гай кужу ӱмырым, вурс гай пеҥгыде тазалыкым, кеҥеж кече гай волгыдо илышым, пиалым да чеченле кумылым.

1 №-ан Краснохолмский КШ-ын коллективше.