Порылыкым да пагалымашым ончыктен миен толмаш

Шыжымсе календарьыште ик ойыртемалтше кече уло. Ты кечын шўм-чон келге тауштымаш шижмаш дене темеш. Илалше еҥ-влакын тўнямбал кечыштым поро кумылан еҥ-влаклан поснак кугу таум каласыме шуэш.

1 октябрьыште ме ачана ден аваланна, кова ден кочаланна кугу тўткышым ойырена. Илыш опытыштлан да ача-авалан, кугурак еҥ, йолташ-влаклан мемнан пўрымаште участвоватлымыштлан таум каласена. Вет илалше еҥ-влакым пагалымаш – калыкын шўм-чонжо илыме показатель, а тудын ончыкылыкшо эртыше жапын пеҥгыде фундаментшылан эҥерта. Нунын шарнымашышт историйнам арала да кажне мутышт, кажне шарнымашышт да каҥашышт – мыланна аклаш лийдыме полыш.

1 октябрьыште районысо ветераным, Кугу Отечественный сарын участникше-влакым Алексей Семенович Исекеевым, Гарифулла Зайдулович Зайдуллиным, Гайнигилим Талипович Мустафиным саламленыт.

Нунын деке Самырык Гвардий вуйлатыше Л.В. Павлова, «Икоян Россий» партийын верысе пӧлкажын исполкомжын вуйлатышыже З.В. Максимова, район администраций вуйлатышын социаль йодыш, кадр да кӧргӧ политике шотышто алмаштышыже Е.А. Алексеева, Калтаса районышто еш служба вуйлатыше С.М. Хамидуллина пӧлек дене толыныт. Юбилей ийын, Сеҥымашлан 75 ий теммылан, республике вуйлатыше Р.Ф. Хабиров деч ветеран-влаклан шарнымаш значокым, тыгак «Наша забота» проект почеш, продукт набор-влакым кучыктеныт.

Илалше еҥ-влакын тўнямбал кечышт – тиде лишыл родо-шочшо, пашам пырля ыштыме йолташ-влаклан таум каласаш пеш сай амал. Тыге ме поро мутна дене илалше еҥ-влакын ўмырыштым кеч изишлан шуена, кумылыштым нӧлталына.

Л. Павлова.

Почешмут. 1 октябрь – тиде илалше еҥ-влаклан, кунам нунылан кугу тўткышым ойырат, саламлат да шке аклымашыштым ончыктат, эртыше суапыштым шарналтат да таум ойлат, ик эн поро да кўлешан пайрем веле огыл, тыгак чыла тукымлан. Лач ты жапыште тукым-влак коклаште кыл шижылтеш да пеҥгыдемеш.

Ты пайрем кечын ялласе клублаште да райрўдыштӧ пайрем мероприятий ден концерт-влак лийын огытыл. Тидыже илалше еҥ-влакын тазалыкыштым арален кодаш манын ышталтын, сандене нуным ик пӧлемыште чумырен огытыл. Кызыт Российыште да мемнан дене республикыштат эпидемиологический обстановко неле лийын кодеш, у коронавирусный инфекций шарла.

Туге гынат, илалше-влакым вниманий деч посна кодаш огыл манын, нунылан онлайн-саламлымаш ден концерт-влакым возеныт.

Ялсовет администраций да культура пашаеҥ-влак, изирак делегаций дене, тушко 2-3 еҥ пурен, шке яллаштышт илалше еҥ-влак деке миен толыныт, нуным пайрем дене саламленыт да пӧлекым кучыктеныт.

Кажне еҥлан, поснак илалше-влаклан кугу тўткышым ойырыман.

А районысо ветеран-влак моткоч куаненыт, вет нуным монден огытыл.