Событий

Уфаште Башкортостан вуйлатыше Радий Хабиров Туныктышын кечыже вашеш республикысе туныктышо-влаклан кугыжаныш наградым да самырык туныктышо-влаклан грантым кучыктен. Радий Фаритович туныктышо-влакым коронавирус пандемий годым чытымаш ден пеҥгыдылыкым ончыктымыштлан, вет тунам дистанционный режимыш куснаш да тунеммаште у методикым кучылташ пернен, кугу таум каласен.

«Те – мемнан жапын чын геройжо улыда, – каласен Радий Хабиров, самырык туныктышо-влаклан грантым кучыктышыла. Вет шукыжо олаште пашам ышташ шона. Но шӱм-чонда тендам селашке ӱжын, вет южик вере комфорт нерген ойлыманат огыл. Но лач тушто те пашам ыштеда да йоча-шамычым туныктеда. Тидлан тыланда кугу тау».

Кузе Башкортостан вуйлатыше палемдыш, тыгай программе, самырык туныктышо-влаклан полышым ончыктымаш, умбакыжат аралалт кодеш.

Пайрем мероприятийыште 1 №-ан Калтаса кыдалаш школын историй ден обществознанийым туныктышыжо Екатерина Михайлован Ахмединоват лийын.

2011 ийыште Екатерина Михайловна 1 №-ан Калтаса КШ-шко пашашке толын. Туныктышо лияш тудо школышто тунеммыж годымак шонен. Профессийым ойырен налмаште кугу рольым туныктышо-влакат модыныт. Поснак историй ден обществознаний урок-влак оҥайын эртеныт. Сандене Екатерина шуко шоныде, историйым туныктышын профессийжым ойырен налын.

Аттестатым налмеке, 2 №-ан Калтаса кыдалаш школын выпускницыже, Бирскысе социально-педагогический академийыш тунемаш пурен. Дипломым налмеке, пашам иктаж-кушко мӱндыркӧ ышташ каяш шонымаш лийын огыл, вет калыкыште ойлат: «Кушто шочынат, туштак кӱлешан лийыныт». Екатерина Михайловна Калтаса селаште пашам ышташ кодеш да 1 №-ан школышто туныкташ тўҥалеш.

Самырык, чулым туныктышо пала, историй – тыгай наука, кудыжо Шочмо эл деке йӧратымашым воспитатлаш полша. Тудын туныктымаш кредожо – йоча-влакым туныктышыла, шкеат тунем. Екатерина Михайловна чўчкыдын квалификацийым кӱкшемдыме курс-влакым эрта, а тӱрлӧ конкурсышто участвоватлымаш шкем вияҥдаш да шкалан ӱшанаш шижмашым шочыкта. 2019 ийыште Екатерина Михайловна «Учитель года» район конкурсышто сеҥен.

Уфашке кузерак миен толда манме йодышлан тудо тыгерак вашештыш:

– Туныктышын кечыже вашеш тиде мыланем эн кугу пєлек лийын. Чаманаш веле логалеш, эпидемиологический ситуацийлан кӧра пайрем мероприятийыш чыла сеҥ ышымат ӱжын огытыл ыле, но мый пиалан-влак коклашке логалынам. Награждатлымаш Уфаште ялозанлык министерствын колонно залыштыже эртен. Кугыжаныш селаште тыршыше туныктышо-влаклан полша да нуным акла, тидыже моткоч сай. Самырык туныктышо-влак, дипломым налмеке, шке районыштышт, селаштышт пашам ышташ кодын кертыт.

Школышто Екатерина Михайловна шке тунемшыже-влаклан туныктышо да наставник улеш, а пӧртыштє – тыршыше вате да кок эргын аваже.

Ушештарена, 2019 ий кеҥежым Радий Хабиров ий еда 100 грантым пуаш палемден. Тудын акше – 600 тӱжем теҥге. 2020 ийыште грантым 150 марте кугемденыт да тудын кугытшо 690 тӱжем теҥге лийын.

Э. Мурсакаева.