Шканет шке полшо

Нигунамат нигӧмат ит туныкто, чын улметым палет гынат. Шарналте, кузе тиде тыйым шке жапыштыже аздарен. Да шкежат кугыеҥын ойлымыжым колыштынат мо?..

Огыт йод гын, полшаш ит тырше. Нигӧ декат ит пижедыл. Лишыл-влакетым тӱнямбалсе чыла осал деч аралаш ит тырше. Просто йӧрате нуным. Вуйым ит ший! Тазалыклан, пошкудылан, властьлан, Пенсий фондлан! Капка ончылсо олмыбалне кычалтылын, вудыматен шинчыше кова гай ит лий.

«Мый тыйын иготышто …», «Мый тылат илышемын ик эн сай пагытшым пӧлекленам…», «Мый тый дечет кугурак улам, сандене сайынрак палем…» манын, нигунамат ит ойло. Тидым чыташ неле!

Уныкат-влак улыт гын, «ковай» манаш ит чаре, лӱмет дене ит ойлыкто. Тыште нимо сайже уке.

Икшывет-влак деч тауштымашым ит вучо. Шарне: сайлан тауштыдымо йоча уке, улыт, манмыла, тауштымым вучышо аҥыра ача-ава-влак.

Самырыкемдыше процедурылан пытартыш оксатым ит кучылт. Нимолан. Лучо путешествийыш миен тол.

Пычкемыш пӧлемыште кӱзгыш ит ончо, макияжым ит ыште. Шканет шке йӧраш да келшаш ит тӧчӧ. Лийме семын чаткан чияш тырше. Лачшымак чаткан, а самырыкын огыл. Ӱшане, тыге сайрак лиеш.

Чурийвылышыже куптырген, ончычсо гай виян огыл, жапын-жапын кычалтылеш гынат, пелашетым арале. Ит мондо, ала-кунам тудат самырык, виян да весела лийын. Да тыйынат самырык, вичкыж, мотор лийметым, очыни, тудо гына шарна.

Шкендым нимолан ит вурсо. Шкендын да йочат-влакын илышда кеч-могай лийже – мом кертынат, чыла ыштенат.

Жап почеш илаш-колаш куржаш ит тӧчӧ: илыш деч кодаш огыл манын, у технологийым лончылаш, уверым эскераш, эреак ала-мо улан тунемаш. Мыняр лиеш?! Лучо мо келша тудым ыште.