Анастасия Сатаева деч мастер-класс

Кӧкыш ял гыч Анастасия Кугубаевна Сатаева Калтаса селасе пайремыш шкенжын куымо станокшым да куэн лукмо изделий-влакым – коврикым, кўвар шартышым конден.

– Тиде походыш коштмо станокем, тўрлӧ выставкылаште лиеда, – ойла Анастасия Кугубаевна. – Пӧртыштӧ акрет годсо станок уло, тудыжо мылам эше авам деч кодын. А тудлан, ковам деч кодын, очыни. Тудлан мыняр ий, нигӧ раш каласен ок керт. Тудын дене чўчкыдын пашам ыштем. Сай куа манын каласен ом керт, чонем тудын дене пашам ышташ шупшеш. Тудын дене авам, ковам куэныт, сандене пуйто нунын шыма кидыштым ниялтен пашам ыштымем гай чучеш. Авам акам ден когыснам эше изинекак кидпашалан туныктен. Самырык годым пашам ышташ коштынна, сандене станок воктеке шинчаш жап лийын огыл. Кызыт гын, сулен налме канышыште улмо годым кидпашалан жап ятыр. Зоя акамлан 85 ий теме, тудо кызытат куа.

Анастасия Кугубаевнан куымо станокшым еҥ-влак кугу интерес дене онченыт да озаж деч «Тиде мо тыгай?», «Кузе тудын дене пашам ыштыман?» манын йодыштыныт. Тудо шкежат кажне йодышлан кумыл шуын вашештен да станок дене пашам кузе ышташ кўлмӧ нерген ончыктен ойлен.

Ю. Шамсутдинов.