«Эн сай вуйлатыше»

– Ольга Валерьевна шке пашажым, йоча-влакым моткоч йӧрата, тудлан ўшанле улеш, – ойлат туныктышо-влак. – Ме тудын деке йодыш дене толына гын, ты але вес занятийым кузе эртараш манын, тудо эре пайдале каҥашым пуа, умыландара, могай литература, наглядный пособий дене пайдаланаш кўлмӧ нерген каласа.

Чын, икшыве-влак туныктышо-влакын эртарыме занятийлашкышт кумыл шуын коштыт. Кажне урок шке семынже ойыртемалтеш – тушто икшыве-влакым эре иктаж-мо у да пайдале вуча. А эше «Улыбка» йочасадыште поро кумыл да мӧҥгысӧ гай атмосфера шижылтеш. Чыла тиде Ольга Валерьевнан тыршымыжлан кӧра. Тудо пашам пырля ыштыме йолташыже-влак дене йочасадыш икшыве-влак кумыл шуын коштышт манын, шкешт деч шогышыжым чыла ыштат.

Эрдене толшо икшыве-влакым Ольга Валерьевна воспитатель-влак дене вашлиеш, тидын годым нуным каныш кечылаште кузе каналтымыштым, кумылыштым йодеш . Кеч икымше гана ончалмаште тудо чатката шўргывылышан коеш, а шыргыжалеш гын – умылет, тудо поро шўм-чонан. Кажне паша кечын шуко тўрлӧє йодышым решатлаш кўлеш, туге гынат вуйлатыше тидлан ок ойгыро, вет решатлыдыме йодыш уке.

О.В. Артемьева ўдыр ден эрге-влак нерген шагат дене ойлен кертеш, а теве шкеж нерген ойлаш ок йӧрате. Тудын мутшо почеш, айдемым паша да поступкыж гыч ужаш лиеш.

– Мый пеш чапле, келшен илыше коллективыште пашам ыштем, – мокталтен ойла шке пашаеҥже-влак нерген йочасадын вуйлатышыже. – Нунын пашаштлан, тыршымыштлан да икшыве-влакым сай ончымыштлан кугу таум каласем. Поснак кажне пашаеҥым мокталтен кертам.

Самырык улмыж годым Ольга Валерьевна кугу коллективыште да эше изи йоча-влак дене пашам ышташ тыланен. Тидын нерген чот шонет гын, шонымашет шукталтеш. Тыгак тудынат миен лектын. Школ деч вара нимом шонкалыде педагогика училищыш документ-влакым сдатлен, а варажым – институтыш. Тунем лекме деч вара педагог-психолог лийын тыршен. 2018 ийыште О.В. Артемьевам Краснохолмский селаште у дошкольный учрежденийым вуйлаташ ўжыныт. У пашаште тўҥалаш кеч-кунамат неле, шуко ойгырен. Пашам пырля ыштыме йолташыже-влак тудлан полшеныт.

Ольга Валерьевна тўрлӧ йодышым решатлаш тырша, чыла шонкален-вискален ышта. Тидыже йочасадлан икымше верлашке лекташ полша. Йочасадын туныктышыжо ден воспитанникше-влак муниципаль, республике, россий, международный творческий выставкылаште, конкурслаште, спорт мероприятийлаште чолган участвоватлат да Чап грамота, Тауштымаш дене палемдалтыт.

А вет коллектив эше йєршеш самырык улеш.

Икманаш, тыгай вуйлатыше нерген кажныже шона: эплын кутырышо, чатката, ушан-шотан, кеч-могай жапыште полышым ончыкташ ямде улеш. Тудын омсаже кажныжлан почылтын, кажне икшыве тушко пуралт лектын кертеш.

15 октябрьыште Ольга Валерьевна шке юбилейжым палемда. Ме, йочасадын коллективше, тудым юбилейже дене шокшын саламлена.

Те чапле ўдырымаш, сай вуйлатыше улыда. Тендам келшыше коллектив дене алал кумылын саламлена. Тыланда пеҥгыде тазалыкым, куаным, пиалым да чыла сайым гына тыланена, шонымашда эре шукталт толжо.

Краснохолмский селасе «Улыбка» йочасадын коллективше.