Калтаса районышто мастар-влак улыт

Республике кече лўмеш калык прикладной творчестве выставкыш пайремыш толшо кажне еҥ пуралт лектын, манаш лиеш. Тыште лийын мом ончаш, а эше мастар еҥ-влак деч мастер-классым налаш.

Мемнан кундемыште кумдан палыме ургызо-влак – Келтей ял гыч Тамара Яндугановна Данилова да Ӱлыл Качмаш ял гыч Дина Сергеевна Раянова шке кид дене ургымо марий калык костюм-влакым ончыктеныт. Тудым ямдылыме, тўрлыман сўрет, сӧрастарыме паша нерген ойленыт.

Эше тидым палемдаш кўлеш, акрет годсо калык костюм-влакым ургымаш – тиде шўм-чонлан келшыше паша веле огыл. Нуно заказ почеш, музейлан, самодеятельный фольклор коллектив-влаклан ургат.

Ю. Шамсутдинов.