Танып эҥер серым эрыктыме шотышто субботник

8 гыч 16 октябрь марте Калтаса район территорийыште «Ару Танып» акций эрта. Теҥгече, 13 октябрьыште, Калмиямучаш ялсоветыш пурышо яллаште илыше калык тиде экологий акцийыш ушнен. Павасоламыт, васоламыт да калмиямучашмыт Танып серым шӱкшак деч эрыкташ лектыныт.

– Танып эҥер – мемнан кундемнан визитный карточкыжо, – ойла Павасола ял клубын культорганизаторжо Снежанна Гараева. – Кеҥежым тыште шуко еҥ кана. Тольык нунын деч вара ятыр шӱкшак кодеш. Чыла вере «канымашын» кышажым ужаш лиеш.

Тудын мутшо почеш, каныше калык деч вара тӱҥ шотышто пластик ден янда кленча, продуктовый контейнер ден упаковко-влак кодыт.

Ушештарена, «Ару Танып» акцийыште чыла район-влак участоватлат, кушто Танып эҥер йоген эрта. Мероприятийын тӱҥ цельже – эҥер серым шӱкшак деч эрыкташ, тыгак калык коклаште экологий культурым шыҥдараш да ончыкыжо тудым вияҥдаш.

О. Айгильдина.