Пожарный надзор вашешта

Светлана Станиславовна, мемнан районышто пожар-влак шотышто ситуаций могайрак?

– 9 тылзе жапыште Калтаса район территорийыште 59 пожар лийын, моло ийла дене таҥастарымаште тидыже 2,1 процентлан шукырак. Пожар годым кум еҥ колен, икте эмганен.

– Тул лекме эн тӱҥ амал могай?

– Икымше верыште – илыме пӧрт-влак. Тений 14 пӧрт йӱлен. Кокымшо верыште вича, монча да молат – 12 пожар. Кукшо шудо – 5, 4 пожар свалкыште лийын, 2 автотранспорт йӱлен. 1 случай – шудо йӱлен. Икте куандара, тений районысо пилорамылаште пожар лийын огыл.

– Конешне, тул лекме верын шке амалже уло. Могай тӱҥ амал-влак, каласен кертыда мо?

– Эн тӱҥ амал – тул дене шекланыде пайдаланымаш, тидын шотыштак тамакым шупшмаш. 9 тылзе жапыште тыгай 27 случайым регистрироватлыме. Иктым палемдыме шуэш, тамакым йӧртыде мален колтымылан кӧра пожар лиеш да тыгодым шуко еҥ кола. Поснак лӱдмашан, кунам тамакым шупшшо еҥ йӱшӧ улеш.

Вес амал – тӱз огыл электрооборудований дене пайдаланымаш. Тидлан кӧра районышто 16 пожар лийын. Коҥга дене пайдаланыме годым 2 пожар лийын, йоча-влак тул дене модмылан кєра – 2, автотранспорт тӱз огыл улмылан кӧра 2 пожар лийын.

Тулым чыкымылан да волгенче перымылан кӧра лийше пожар-влакым регистрироватлыме огыл.

– Светлана Станиславовна, чыла тиде пожар мемнан район территорийыште лийын. Могай ялсоветлаште, каласен кертыда мо?

– Келтей ялсоветыште куд пожар, Краснохолмскийыште – латшымыт, Калтаса ялсоветыште – латикте, Кугу Качак ялсоветыште – кумыт, Ӱлыл Качмаш ялсоветыште – нылыт, Савакмарий, Амчемучаш, Тӧлдӧ ялсоветлаште – кокыт дене, Калмиямучаш ден Калегин ялсоветлаште – икте дене.

– Пожар годым колышо-влакат лийыныт манын те каласышда: кушто да мыняре?

– Икте Краснохолмский ялсоветыште, кокыт Калегин ялсоветыште, Ӱ лыл Качмаш ялсоветыште лийше пожарыште ик еҥ сусырген. Тул дене шекланыде пайдаланымылан – ломыжым ведраште кодымылан да тамакым шупшмылан кӧра – еҥ-влак коленыт. Нунын кокла гыч колышо ик еҥ йӱшӧ лийын.

– Пожар ынже лий да тушто еҥ-влак ынышт коло манын, могай профилактике мероприятий-влакым эртареда?

– Противопожарный режимым шуктен толмо шотышто мемнан районышто профилактикым намийыше 33 группа уло. Нуно калык коклаште противопожарный режим правил-влакым шуктен толмо шотышто профилактике мероприятий-влакым эртарат. Мутлан, 9 тылзе жапыште 3910 илыме пӧртым тергыме, верысе самоуправлений органлашке, прокуратурышко да административный комиссийлашке 28 увертарымашым колтымо. Тыгак ме калыкым газет гоч увертарена, калык дене погынымаш-влакым эртарена. Икмыняр категорий калыкым учетыш налына. 2020 ийыште мемнан учетышто шуко икшыван 317 еш, начарын илыше 197 еш, шкет илыше да илалше 591 еҥ шога.

– Мучаште могай тыланымашда уло?

– Тыланымашем, конешне, мыйын шуко. Профилактике группа-влак шотышто замечанием уло. Нунын коклаште электрический, газовый сферыште тыршыше пашаеҥ-влак, тыгак коҥам оптен моштышо мастар, депутат, образований ден социальный службо пашаеҥ-влак уке улыт. Вет пӧртлаште тӱҥ шотышто электрооборудований ден коҥга тўз огыллан кӧра пожар лиеш. Таче гын, тидын шотышто пашам ялсовет администраций пашаеҥ-влак гына намият.

Пӧрт еда коштмо годым пожар лӱдыкшыдымылык шотышто пудыртымо правил-влакым кораҥдыме шотышто бланк-предложений-влакым огыт шалате. Инструктаж-влакым чўчкыдын устно гына эртарат, журналыште палым ыштат, а бланкым огыт пу. Южгунам бланк-предложенийым пуат гынат, тудым кӱлеш семын огыт заполнятле. Электрооборудованийым алмаштыме але олмыктымо шотышто адрес полышым ончыктымо йодыш-влак мемнан район территорийыште огыт ончалт. Але ончалтыт гын, тидын годым нимогай документым огыт оформитле.

А тыланымаш мыйын тыгай: пожар-влак шотышто профилактике пашалан кугу тӱткышым ойырыман, поснак шыже-теле жапыште. Лач тиде пагытыште пожар чот кугемеш. Кече йӱштылан кєра электрооборудований дене пайдаланаш да коҥгаш олташ тӱҥалыт.

О. Айгильдина серен налын.