«Транснефть» УГНТУ студент ден туныктышо-влакым стипендий да сертификат-влак дене палемден

Уфа оласе нефтяной технический университетын (УГНТУ) студентше ден туныктышыжо-влак «Транснефть» компаний деч социаль тӱлам палемдыме нерген лӱмын стипендий ден сертификат-влакым налыныт. Ты мероприятий ий еда УГНТУ-ын актовый залыштыже эрта. Тений гын «Транснефть-Урал» АО ден нефтяной университет коклаште шке шотан «телемостым» палемдалтын лийын: тидыже коронавирус инфекцийым шаркалаш огыл манын, мероприятий онлайн-форматыште эртен.

Социаль тӱлам палемдыме нерген сертификатым трубопроводной транспорт факультетын 7 доцентше да профессоржо налын. Нуно туныктымо да шымлыме пашам намият. Тиде цельыш виктаралтше тӱла: тудым квалификацийым кӱкшемдаш, лекций курсым але монографийым ямдылаш да лукташ, профессиональ да научный паша шотышто вияҥаш кучылташ лиеш. Тиде нефтепроводчик-влакын туныктымо пашам саемден колтымаште, кадр-влакым ямдылыме уровеньым кӱкшемдымаште надырышт, икманаш – отрасльым вияҥдымаш.

«Транснефть» университетын эн сай студентше-влаклан лӱмын стипендийым коло ий утла пуа. Опыт гыч ужаш лиеш, студент-влаклан стипендий сай тунеммаште да научный пашаште чолга лияш веле огыл кумылаҥда, тыгак ончыко вияҥаш да кугемаш стимул улеш. Тений тыгай стипендийым 17 студентлан кучыктымо – 12-шо «нефтегазовое дело» специальность почеш тунемеш, кокытшо – «нефтегазовая техника и технология» да «автоматизация технологических процессов и производств», иктыже – «строительство» специальность почеш шинчымашым пога. Тидын годым визытше «Транснефть» системын организацийже-влак дене договор почеш тунемыт, 12-шо – бюджет пӧлкаште.

«Транснефть–Урал» АО-ын генеральный директоржо Роман Ковалев стипендийым налше-влакым саламлен.

– Эшета сайрак результатлашке шуаш ӱжам, ончылныда амбизиозный цельым шындыза да тушко шуаш тыршыза. «Транснефть» да «Транснефть–Урал» АО нунын дене ушан-шотан, цельыш шуаш тыршыше, задаче-влакым решатлымаште творческий йӧным муын моштышо самырык специалист-влак пашам ыштышт манын, шкешт деч шогышыжым чылажымат ыштат. Университет дене ме пашам ыштена, вузын материально-технический базыжым пеҥгыдемдымаште оксам пыштена. Тыланда тыште сай шинчымашым налаш чыла условият уло – сай лабораторий, тунемме пособий, тыгак факультетын виян туныктышыжо-влак.

«Транснефть» ПАО-ын л¢мын стипендийжым УГНТУ-ын эн сай студентше-влак 2001 ий гыч налыт, туныктышыжо-влаклан сертификатым 2014 ий гыч пуат.

Дмитрий Соснин, 4-ше курсын студентше:

– «Транснефть» деч стипендийым мый кокымшо гана налам. Мыйын шонымаште, тыгак стипендийым налаш кажне студентлан кумылло. Компаний мемнан тыршымынам акла, эшета сайрак тунемаш да научный пашам намияш кумылаҥда. Тудо шкенан потенциалнам почмаште кугу полышым ончыкта – самырык специалист-влакын конференцийлаштышт участвоватлымаш, практикым производственный объектлаште эртымаш, стипендий. Тидлан кугу таум каласыме шуэш.

Эльвира Ахметгареева, 4-ше курсын студенткыже:

– Эртыше семестрыште мемнан занятийна-влак лабораторийлаште эртеныт, а нунышт «Транснефть» компаний полшымо дене уверситетыште почылтыныт. Лач тыште мылам чыла пашам шукташ йӧн лие. Корпоративный стипендий мемнан сай тунемаш, вияҥаш тарата. «Транснефть» деч тиде мыйын икымше стипендием, тудо поснак шерге. Вет тудым налаш мый чот тыршенам, тунеммаште ойыртемалтынам. Кугу тау!