Поро пашам ыштена - шўгарлам тўзатена

Калмиямучаш ялсоветыш пурышо яллаште илыше калык ППМИ-ште (Программа поддержки местных инициатив) участвоватла.

Ушештарена, мемнан район территорийыште Программа поддержки местных инициатив программе вич ий ончыч илышыш шыҥдаралташ тўҥалын. Ты жапыште районышто 24 млн. теҥгелан 38 проектым илышыш шыҥдареныт.

ППМИ-лан кӧра Баръяза ял калык уремыште корным олмыктен, а калмиямучашмыт эртыше ийын шўгарлам тўзатеныт.

Тений Программа поддержки местных инициатив программыште участвоватлаш Павасола ял калыклан черет шуын. Республике кечылан лўмдалтше погынымаште ты йодышым ончылгоч каҥашеныт. Шуко еҥ ял шўгарлам олмыктымылан да тўзатымылан йўкшым пуэн. Кузе мыланна ялсовет администраций вуйлатыше Валерий Маязов увертарен, кызытсе жаплан смета ямде, тидын дене келшышын, шўгарла йыр печым, капкам ышташ, кўкшӧ да тошто пушеҥге-влакым руаш да моло неле пашам шукташ палемдалтеш.

Мемнан корр.