Чулым, поро да самырык шӱм-чонан

Туге гынат, ийготым шотыш налде, тудо моткоч чулым улеш.

Шуко ий Мария Николаевна Сылвийысе фельдшер-акушер пунктышто пашам ыштен. Пелашыже, Измайлов Владимир Исаевич дене ныл йочам ончен кугемденыт. Нуно чыланат илышыштышт шке корныштым муыныт, чыланат пашам ыштат. Мария кова ынде уныка-шамычын сеҥмашыштлан куанен ила.

Кузе мый кӱшнӧ возышым, Мария Николаевна пеш чулым улеш, весела, поро кумылан ӱдырамаш, мер пашам йӧрата, «Райдем-райдем» ансамбльын чолга участницыже. Кидпашалан мастар, тудын кидпашаже-влакым тӱрлӧ выставкыште да ял пайремлаште ужын кертыда.

Йолташ ӱдырем тыгак путешествоватлаш йӧрата. Пытартыш ныл ий жапыште ме тудын дене сылне Санкт-Петербургышто, Казаньыште лийна, Йошкар-Олашке «Пеледыш пайремышке» мийышна. Российын «Золотое кольцожо» йыр коштын савырнышна: Суздаль, Владимир, Нижний Новгород, Углич, Ярославль, Рязань. Тиде поездкыште ме ял гыч кок ӱдырамаш гына лийынна, сандене турын организаторжо-влак мемнам специальный грамота дене палемдышт. Тений Волгоград герой-олашке каяш шоненна ыле, но коронавирус пандемийлан кӧра миен ыш лек.

Йолташ ӱдыремлан пеҥгыде тазалыкым, чон ласкалыкым да кужу ӱмырым тыланен кодам.

Т. Валикаева, Калегин ял.