Сарын геройжо-влакым шарныме лӱмеш

Нуно шукертак ош тӱням коден каеныт, туге гынат, калык нуным шарнен ила. Теве ял покшелне печен налме обелискат тӱрлӧ тукымым иктыш ушен шогаш тӱҥалеш. Обелискым ял калыкын тыршымыжлан да «Реальные дела» партий проект почеш чоҥен шындыме. Изи Агытан ял калык шукертсек ялыште сарын участникше-влаклан обелискым чоҥымо нерген шонен. Тиде шонымаш дене Краснохолмский ялсовет администрацият келшен. Оксам погаш тӱҥалыныт, поро пашашке чыланат ушненыт – ялыште шочшо, но кызыт йот кундемыште илыше-влакат, ял калыкат. Ик ужашыжым калык поген, весыжым «Единая Россия» партий ойырен. Тыге веле кугу шонымашым пашашке колтымо.

– Эше ик обелискым чоҥымо, тидыже куандара, – ойла муниципаль район Калтаса район Советын секретарьже Ирина Кононова. – Тышке ме вуйнам саваш, шарналташ толына. Тыште тӱрлӧ меропритяий-влак эрташ тӱҥалыт. Кӧ тиде поро да кугу пашалан оксам пуаш чаманен огыл, кугу тау.

Ирина Рифовнан мутшо почеш, «Реальные дела» партий проектым илышыш шыҥдараш тӱҥалмеке, районышто моткоч шуко паша ышталтын: ятыр объектым чоҥымо, олмыктымо, уэш чоҥымо.

– Автобус остановко-влак гыч тӱҥалме, вара йоча площадке, обелиск ден памятник-влакым чоҥымо, культура пєрт ден школ-влакым олмыктымо, палемдыш тудо. – Тиде проектлан кӧра шуко пашам ыштыме. Ирина Рифовна ялын старостаже Ирина Икрянниковалан «Благоустроено в рамках проекта «Реальные дела» табличкым кучыктыш.

Пайремышке тыгак «Единая Россия» партийын верысе пӧлкажын исполнительный секретарьже Зоя Валеевна Максимовам, Краснохолмский ялсовет администраций вуйлатыше Семен Владимирович Цедилкиным, район Советын депутатше Борис Ильдусович Имаевым, депутат-влакын фракцийыштын вуйлатышыже Нина Степановна Ильгузинам ӱжмӧ лийын. Кажныже Изи Агытан ял гыч лекше герой-влак лӱмеш поро мутым каласен.

Могай пайрем пєлек деч посна? Зоя Валеевна Максимова Кугу Агытанысе тӱҥалтыш пєлкан секретарьже Элиза Егоровалан да тудын полышкалышыже, библиотекарь Татьяна Ильчибаевалан, Краснохолмский ялсоветын депутатше, ялын старостаже Лариса Икрянниковалан, Краснохолмский ялсовет администраций вуйлатыше Семен Цедилкинлан, автор да мурызо Генадий Тимеряевлан, ялын илалше еҥже-влаклан Малина Егорова ден Екатерина Сайфуллиналан шарнен кодаш пӧлекым кучыктен.

Шуко поро мутым унамыт ялын старостаже Лариса Икрянниковалан ойленыт. Тудын тыршымыжлан кєра ялыште шуко паша ышталтеш – субботник, обелискым чоҥаш оксам погымаш – чыла тудын пашаже. Чулым да чолга, вуйын шогышо да поро ӱдырамаш. Ялыште тудын гай поро шӱм-чонан еҥ-влак ятыр улыт. А кунам нуно иктыш чумыргат, пӱсӧ йодыш-влакым пырля решатлат – тӱнят порырак да волгыдырак лиеш.

Лентам пӱчмаш, у мемориал воктеке пеледыш ден венок-влакым пыштымаш, муро ден почеламут – мероприятийыште чыла тиде лийын, тиде поро йӱлашкак пурен. Мыланна тиде йӱлашкак пурен, тольык изи агытанмытлан огыл. Нунылан тиде шӱмеш логалше событий лийын, вет обелискыште нунын родо-шочшыштын лӱм ден фамилийышт курымешлан возен шындыме. Кӧ мыланна тыныс да пиалан илышым пӧлеклен, нунын фамилийыштым.

О. Айгильдина.