Образований

17 октябрьыште игече йӱштӧ ыле гынат, 2 №-ан Калтаса кыдалаш школыш тунемше-влак огыл, а шушаш тунемме ийын икымше классыш тунемаш толшо икшыве-влак вашкеныт. Тиде кечын ача-ава-влакат сурт сомылым ӧрдыжкє кораҥден, икшывышт дене пырля «День будущего первоклассника» пайремыш вашкеныт. Тиде мероприятийын тӱҥ цельже – ончыкылык тунемше ден нунын ача-аваштлан школ нерген шинчымашым пуаш. Вет, очыни, кажне ача-ава тудын икшывыже могай школышто шинчымашым налаш тӱҥалеш, палынеже.

Фойеште изи унамытым школын туныктышыжо-влак: тӱҥалтыш класслаште туныктышо-влак М.Н. Петрова, С.В. Шакиева, С.А. Хузина, историйым туныктышо Т.П. Сайгина да директорын воспитательный паша шотышто алмаштышыже Н.Н. Ахунова вашлийыныт.

Йоча-шамыч «Тыйын кузе лӱмет» модыш дене модыныт. Тыште нуным посна тӱшкалан шелыныт да йоча-влак туныктышо дене пырля оҥай «Школяндий» элыш каеныт. «Сай кумыл пӧлем» – сенсорный пӧлем, тыште икшыве-шамычым поро фея, туныктышо-психолог Н.А. Корнева вашлийын, тыгак нуно «Тазалык корно» дене эртеныт.

«ПДД-ым палыше-влак» станцийыште технологийым туныктышо В.А. Думбадзе дене пырля «Корно знак» пазлым погеныт, корнышто шкем кузе кучаш кӱлмӧ нерген мутланеныт. Школ музейыште экскурсовод А.Р. Ахмадуллин йоча-шамычым марий калык костюм дене, Кугу Отечественный сар жапысе экспонат-влак дене палыме ыштен. Школ библиотекарь Т.И. Бутусова йомакысе герой-влак нерген туштым туштен.

Химий кабинетыште йоча-влак «Химий веществан юзо тӱняшкыже» шуҥгалтыныт. Туныктышо Э.М. Камалетдинова «Вулкан», «Щелочь средаште тӱс вашталтмаш», «Сера ден кӱртньӧ опилке-влакым магнит полшымо дене ойырымаш», «Кристалл-влакым куштымаш» оҥай опыт-влакым ончыктен.

Туныктышо-логопед Т.Я. Сокова йоча-шамыч дене «Логоротмике», «Сем тӱняшке путешествий» занятий-влакым эртарен.

Школын спортзалыштыже физкультурым туныктышо О.И. Иргибаев дене пырля нуно шке вийыштым, чулымлыкыштым, мастарлыкыштым тергеныт. В.А. Думбадзе «Весела куштымаш» флешмобым эртарен.

Технологийым туныктышо-влак Г.П. Байрамова ден Н.Е. Тимофеева, тӱҥалтыш классыште туныктышо И.Е. Айдимирова «Мый – ончыкылык икымше классыште тунемше» фотосессийым эртареныт.

Мероприятий мучаште йоча-влак шарнен илаш пӧлекым налыныт.

***

Икшыве-шамыч школ илыш дене палыме лиймышт годым, ача-ава-влаклан «Особенности зачисления в первый класс, правила подачи заявления через портал «Госуслуги» мастер-классым ИКТ шотышто школ директорын алмаштышыже Т.Я. Сокова эртарен. Социальный педагог Г.М. Курбанова ача-ава-влакым школышто шокшо кочкышым организоватлыме нерген каласкален.

Ача-ава-влак ончылно школ директор Р.Х. Бигаев «Достижения школы за последние 5 лет» презентаций дене выступатлен. Нунылан расписаний ден темлымаш-влак дене буклет-влакым кучыктен.

Школ администраций пайремым эртараш полшышо-влаклан кугу таум каласа.

Пагалыме ача-ава-влак, ме Тендам да Тендан йочада-влакым мемнан школышто вучен кодена.

Н. Ахунова, воспитательный паша шотышто школ директорын алмаштышыже.