Черет деч посна диспансеризаций

Калтаса районышто кугыеҥ-влаклан диспансеризаций сентябрь тўҥалтыше угыч тўҥалын. Тидын нерген Калтасасе райрўдӧ эмлымверын медицине профилактике шотышто врач Л.И. Лобова увертарен.

Лилия Ивановнан мутшо почеш, тачысе кечылан районысо эмлымверыште Диспансеризацийын икоян кечыже пеҥгыдемдалтын. У коронавирус инфекций ынже шарле манын, диспансеризаций санитарно-эпидемиологический йодмаш почеш эртаралтеш. Тылзын икымше шуматкечыжын Калтасасе рўдӧ эмлымверыште да тылзын кумшо шуматкечыжын Краснохолмский эмлымверыште 8.00 гыч 16.00 шагат марте, арня еда, вўргечын, эмлымверлаште чыла специалист 19.00 шагат марте пашам ышта. Тылеч посна тыланыше-влак кеч-могай кечын 14.00 гыч 17.00 шагат марте текшырымашым эртен кертыт. Диспансеризацийым эртыше граждан-влак флюорографический текшырымашым, ЭКГ-ым эртен, шинча давленийым висен, вўрым холестерин да шекарлан сдатлен, вўрын чумыр анализшым, смотровой кабинетым, ФГДС-ым, спирометрийым да молымат эртен кертыт. Ийготым шотыш налын чыла анализым да текшырымашым эрташ палемдат.

– Эпидемиологический условийым шотыш налде, еҥ-влак шке тазалыкыштым текшыраш толыт, – каласыш мыланна медицине профилактике шотышто врач. – Эртыше арнян, вўргечын, Краснохолмский да Калтаса эмлымверлаште 50 утла еҥ диспансеризацийым эртен. Эпидемиологический ситуаций неле гынат, врач-влак, тыгак калык, чер-влакым тўҥалтыш стадийыште пален налаш тыршат. Тазалык нерген мондыман огыл.

Ушештарена, 2020 ийыште диспансеризацийым 1981, 1984, 1987, 1990, 1993, 1996, 1999 ийлаште шочшо, тыгак 40 ий деч кугырак чыла граждан (Минздравын 2019 ий 6 майыште лекше пунчалже почеш) эртышаш улыт.

О. Айгильдина.