COVID-19: черланыме у случай-влак

Пытартыш кечылаште Калтаса районышто у коронавирус инфекций дене черланымаш шотышто обстановко тургыжландарыше лийын кодеш. Калтаса селасе райрўдӧ эмлымвер кузе увертара, октябрьын 18 кечыжлан COVID-19 дене черланыме 26 случайым регистрироватлыме, тидын годым пытартыш арнян – 18 случай. Эше тидым каласаш кўлеш, 17 октябрьыште ик кечын гына 12 еҥын коронавируслан результатше «положительный» лийын.

Калтаса райрўдӧ эмлымверын врачше Р.Д. Гимранов кузе умыландара, COVID-19 диагноз (17 октябрьлан «положительный» результат дене пациент-влак шотышто) районышто илыше вич еҥын пеҥгыдемдалтын, пашам ыштыме верыште – 2, моло верла гыч толшо кум еҥын. Тыгак эше ик медпашаеҥ черланен.

Арнялан внебольничный пневмоний диагноз дене терапевтический пӧлкаш 5 еҥым госпитализироватлыме, чылаже октябрьлан тыгай диагноз дене 7 пациент лийын.

Врач-влак у коронавирус инфекций ынже шарле манын, маске ден перчаткым чияш, социаль дистанцийым текшыраш, калык погынымо мероприятийлаште участвоватлаш огыл да илалше еҥ-влаклан самоизоляций режимым шукташ йодыт.

Мӧҥгыштыда шкендам шке ида эмле. ОРВИ-ын, гриппын, у коронавирус инфекцийын иктаж-могай признакше уло гын, вигак мӧҥгышкыда медпашаеҥым ўжыктыза, моло-влакым черландараш огыл манын, эмлымверыш шке ида кошт. Черлан диагнозым шындаш манын, участковый врач терапевт, педиатр могай лабораторный текшырымашым ышташ да кунам тудым эртараш каласа.

Эше ик гана ушештарена, у коронавирус инфекций юж да еҥ деч куснен кертеш, организмыште писын шарла, а эмлалташ кужу жап кўлеш лиеш. Ты черым эмлаш да профилактике шотеш йўаш эм уке. Вакциным ыштыме, но тудыжат эше шагал. Сандене шкендам шке аралыза да дезинфекций средства-влак дене пайдаланыза.