Еҥ-влакын пўрымашышт гоч – сарын историйже

Ты конкурсым Башкортостан Республикын архив паша шотышто управлений организоватлен. Чапландарыме церемоний видеоконференций форматыште, онлайн режим семын эртен. Мемнан район гыч тушто район администраций вуйлатышын алмаштышыже Елена Анатольевна Алексеева, администрацийын архив пӧлкам вуйлатышыже Елена Борисовна Сайтаева да конкурсын лауреатше-влак – шымлыме пашан научный вуйлатышыже, Павасола кыдалаш школын туныктышыжо Элита Романовна Тамиева да школын выпускницаже, кызыт Бирск оласе медико-фармацевтический колледжын студенткыже Александра Никифорова участвоватленыт. Чаманен каласаш логалеш, ты церемонийыште эше ик лауреат – Леонид Тамиев, кызыт тудо Уфа оласе топливно-энергетический колледжыште тунемеш – участвоватлен кертын огыл.

Лауреат-влакым сеҥымаш дене БР-ын архив паша шотышто управленийын вуйлатышыже И.З. Фаткуллин да республикын калык архивын вуйлатышыже Г.Г. Хайритдинов саламленыт. Нуно конкурсын участникше-влакын Кугу Отечественный сар, ту жапыште илыше да тушман ваштареш фронт ден тылыште пашам ыштыше еҥ-влакын пўрымашышт нерген материал-влакым погымо пашаштын кўлешлыкшым кўкшын акленыт. Чыла пашам, мутат уке, сар нерген шарнен илаш манын, ўмыраҥдыме лиеш.

Лауреат-влакым районышто чапландареныт. Елена Алексеева ден Елена Сайтаева Элита Тамиевам да тудын тунемшыже Александра Никифоровам тыгай кугу пашам шуктымыштлан шокшын саламленыт да Димломым, шарнымашеш кодшо пӧлек-влакым кучыктеныт. Мемнан лауреатна-влак «Труженики тыла и дети войны деревни Бабаево» пашашт «Труженики тыла и дети войны нашего края» номинацийыште кумшо верыш лектын.

– Конкурс Кугу Отечественный сарыште сеҥымылан 75 ий теммылан лўмдалтын да эше эртыше ийынак увертаралтын лийын, – ойла Элита Романовна Тамиева. – Мый Александра ден Леонидлан сар теме почеш шымлыме пашам эртараш да конкурсышто участвоватлаш темлышым. Сарыште участвоватлыше еҥ-влак нерген материал-влак улыт, нуным савыктыме, калык пала. А теве тылыште тыршыше, мемнан яллаште ту жапыште илыше да пашам ыштыше еҥ-влак нерген ме нимомат огына пале. Сандене ме «Труженики тыла и дети войны нашего края» номинацийым ойырен нална. Александра ден Леонид Павасола ялыште сурт еда коштыныт, кова да коча-влак деч сар нерген шарнымашыштым каласкалаш йодыныт да нуным возгаленыт. Кызыт ялыште кредалмаште участвоватлыше-влак илыш дене чеверласеныт, тылыште пашам ыштыше-влаклат шагал улыт. Сандене нунын шарнымашышт моткоч шергакан. Сар жапын икшывыже-влак мыланна шукым ойленыт. Тыгак ту жапысе похозяйственный книга почеш паша миен. Район администрацийын архив пєлка вуйлатышыже Елена Борисовна Сайтаева да районын историко-краеведческий музейын вуйлатышыже Роберт Шарафович Шакиров кугу полышым ончыктеныт. Нуно Павасола ял дене кылдалтше архив да исторический документ-влакым ончыктеныт. Мемнан пашанам конкурс комиссий кўкшын аклен, тидлан ме моткоч куаненна.

Эше тидым палемдаш кўлеш, Элита Романовна шке тунемшыже-влак дене икымше гана веле огыл тыгай конкурслаште участвоватла. Мутлан, эртыше ийын «Самырык архивист» всероссийский конкурсышто кокымшо верыш лектыныт. Тылеч ончыч эше икмыняр конкурсышто участвоватленыт.

– Мый шкеже англичан йылмым туныктем гынат, историйым моткоч йӧратем, – ойла Элита Романовна. – Икшыве-влак дене шымлыме пашам ме англичан йылме денат эртаренна. Англичан да марий йылме-влакын келшен толмыштым да ойыртемжым шымленна. Тидыже ӧрыктарыш, англичан калыкмут да тоштымут-влак чылажат окса, поянлык нерген, а марий калыкын – илыш, калык коклаште келшымаш, паша, пўртўс нерген.

Ю. Шамсутдинов.