Все новости
Новости
27 Шыжа 2020, 14:00

Мобиль поликлинике ял калык деке толын

Калтаса районышто тазалык поезд пашам ыштен

Медик-влак гыч шогышо бригаде «Таза республике – таза регион» акций почеш, ныл кече Киябак, Кугу Агытан, Ӱлыл Качмаш яллаште да Кӧтерем селаште пациент-влакым приниматлен.
Кокымшо остановко, тушто мемнан газетнан корреспондентшат миен, Кугу Агытан ялыште лийын. Тыште врач деке приемыш Кугу Агытан ял гыч веле огыл, тыгак Изи Агытан да Тынбахте ялла гыч еҥ-влак толыныт.
Бирск, Нефтекамск да Уфа олла гыч специалист да техника дене кум медицине машина Культура пӧрт ончылно шогеныт. Икымше гана ончалмаште нимом ӧрыктарышым ужаш ок лий. Кок кугу машина ончылно еҥ-влак маске дене шке черетыштым вученыт. Машина кӧргыш пурымеке вигак ужына, тыште чылт поликлинике мо. Тыште эмлымверысе гай кабинет-влак улыт. Калык электрокардиографийым, спирографийым эртен, артериальный да шинча кєргє давленийым висен, холестерин ден шекарлан вўрым сдаватлен. Тыгак хирург, стоматолог, окулист, терапевт, акушер, кардиолог-влак дене текшыралташ, ВИЧ-лан вўрым сдаватлаш да УЗИ-ым ышташ йӧн лийын. Эн тўҥжӧ – пелен паспорт ден медицине полис лийшаш. Тыгак колесан поликлиникыш пурымо условий – маске лийшаш. Эше тидым каласаш кўлеш, медик-влак бригадыште ӧрдыж гыч толшо врач-влак веле огыл, тыгак мемнан Калтасасе эмлымверын пашаеҥже-влакат пашам ыштеныт.
А ял калык шке тазалыкше верч ойгырта. Сандене тышке тыглайлан огыл, а текшыралташ толыныт. Кӧн дыр шукерте огыл инфаркт лийын, а кӧн дыр шекар диабет. Тўҥ шотышто хронический чер дене орланыше еҥ-влак толыныт. Нунылан консультаций, эмлымашым кўлын. Тынбахте ял гыч Валиуллин Вениамин тугок консультацийлан толын.
– Тыште республике кардиорўдер гыч кардиолог пашам ышта, – ойла Вениамин Витальевич. – Мыйын шўм велым проблеме уло. Сандене тыгай шанс дене пайдаланаш лийым. Вет мемнан дене районышто тыгай специалист уке. А тыште тугок. Пеш сай.
Ала-кушко ӧрдыжтӧ жапым йомдарен специалистым кычал кайыман огыл. Вет чылаштынат огыл ял гыч лекташ йєнышт уло. Тиде акций – нунылан утарымаш, вет иканаште икмыняр специалистым эрташ лиеш. Чынжым каласаш гын, ончыч ик специалист деке райрўдыш кайыман, весыж деке – Нефтекамскыш, уке гын, йӧршеш республикынан рўдолашкыже, 200 км ӧрдыжкӧ. Сандене яллаште илыше калык медик-влакын толмыштлан моткоч куаненыт, вет калыкат шке тазалыкше верч ойгырта.
– Калык шуко толын. Тидыже моткоч сай, нуно шке тазалыкышт нерген шонаш тўҥалыныт, – ойла Калтасасе райрўдӧ эмлымверын кугурак фельдшерже Людмила Валтиева. – Мут толмашеш, икымше кечын Киябак ялыште тазалык поезд шўдӧ утла еҥым приниматлен.
Медик-влакын мутышт почеш, мўндыр ялла гыч еҥ-влак тазалык мобиль рўдер-влакын толмыштым вучат да нунын деке приемыш вашкат.
О. Айгильдина.