Шке пӧртышт дене илаш тўҥалыт

Тушко муниципаль район Советын депутатшым, тулык да ача-ава попечений деч посна кодшо икшыве-влакын опекуныштым, законный представительыштым ўжмӧ лийын.

Нуным район администраций вуйлатышын пашажым шуктен толшо Юрий Садыров саламлыш.

– Таче, – каласыш тудо, – те пачер деч суравочым веле огыл, тыгак у, пиалан илыш деч суравочым налыда. Тек тудо ончыкыжымат пиалан да волгыдо лиеш. А тендан пӧртыштыда куанле лийже, йоча-влакын шыргыжме йўкышт шоктыжо.

Умбакыже Юрий Минзарипович мемнан республикыште, районышто ешлан, икшывылан, инвалидлан, пенсионер-влаклан полышым ончыктымо паша нерген ойлыш.

– Ий еда ме 10-15 утла пачерым чоҥена але налына, – палемдыш тудо. – райрўдыштӧ чапле пӧрт дене микропереулко-влак улыт. Нуныштым тулык да ача-ава попечений деч посна кодшо икшыве-влаклан лўмын чоҥымо. Ты пачер-влак деч суравочым налмеке, тудым кучымо паша тендам ўмбак возеш, – палемдыш Юрий Минзарипович. – Тушто шкендам чын оза семын шижаш тўҥалыда манын, ўшанем.

Тулык икшыве-влакым Советын депутатше-влак Виталий Акиев ден Светлана Хамидуллина, район администраций вуйлатышын алмаштышыже Елена Алексеева шокшын саламлышт.

У пӧрт-влакын озаштлан поро йўла почеш «Доверие плюс» ООО деч пӧлек-влакым кучыктеныт.

Мемнан корр.