Йӧратымаште да келшымаште

Пел курым наре пырля йӧратымаште да пагалымаште илыше еш мужыр-влак самырык тукымлан сай пример улыт. Сандене пырля илыш корным эртыше юбиляр-влакым кугыжаныш уровеньыште чапландарат. Республике вуйлатыше Радий Хабиров деч саламлымаш адресым да пӧлекым шӧртньӧ, бриллиант да сай сўаным палемдыше мужыр-влак налыт.

Шукерте огыл район администраций вуйлатышын алмаштышыже Елена Анатольевна Алексеева да ЗАГС пӧлка вуйлатыше Ирина Владимировна Валеева Аткўль ял гыч вате-марий Шакировмытым – Мидхат Шакирович ден Назиба Назаровна деке миеныт. Нуно тений шыжым бриллиант сўаным – 60 ий пырля келшен илымыштым палемденыт.

Аткўль ялыште 1 Май уремыште Шакировмытын кугу огыл пӧртышт пеш мотор койын шога. Оралтышт, сад участкышт, пакчаштышт – чыла ару. Илалше улыт гынат, вате-марий шке озанлыкыштым кучат. Пакчаште пареҥгым, вожсаскам, пакчасаскам ончен куштат. Шакировмытын пӧрт кєргыштат волгыдо, мотор, ару.

Мидхат Шакирович ден Назиба Назаровна сай илышым иленыт. Самырыкышт годым шочмо эл верч пашам ыштеныт, кок икшывым ончен-куштеныт да йол ўмбаке шогалтеныт. Мемнан газетнан сентябрь тылзын лекше ик номерыштыже Шакировмыт нерген материалым савыктенна ыле. Тудым нунын икшывышт да уныкашт-влак возеныт. Сандене ты гана ме нунын илышышт нерген шуко возаш огына тўҥал. Юбиляр-влакым чапландарыме нерген гына каласынем.

Шке бриллиант сўаныштым вате-марий шокшо да чевер сентябрь кечын палемденыт. Икшывышт, уныкашт-влак, родо-шочшышт толыныт.

– Пӧртна кугу огыл гынат, чылалан вер ситен, – ойла Назиба Назаровна. – Игечат сай лийын, сандене ўстел сийым оралтыште погенна, шашлыкым ыштенна. Ме пелашем дене пырля моткоч куаненна, родо-шочшына-влак мемнам пагален саламлаш толыныт.

Мидхат Шакирович ден Назиба Назаровна Елена Анатольевнан республике вуйлатыше деч саламлымаш адресым лудмыж годым кумылышт тодылалтын. Пашам тыршен ыштымыштлан, сай илышым илымыштлан, самырык-влаклан пример улмыштлан мут-влак шўмеш логалыныт.

Шакировмыт деке икшыве да уныка-влак веле огыл, тукым шольо-шўжарышт, нунын икшывышт-влак чўчкыдын унала толыт. Мемнан мийымына кечын нунын дене Мидхат Шакировичын тукым шўжарже Маулида Кабировна Хузина пелашыже Фандаус Зиевич дене пырля толыныт ыле. Нуно шкешт Ижевск олаште илат. Сулен налме канышыште улыт. Маулида Кабировна школышто туныктышо лийын пашам ыштен, а Фандус Зиевич – Вооруженный вийын отставкысе полковникше.

– Мидхат павай ден Назиба кокай мемнан тукымнан ик эн пагалыме еҥже-влак улыт, – ойла Маулида Кабировна. – Шочшына-влак кугу улыт, элна мучко илат. Юбилей дене тўрлӧ лукла гыч саламлымаш-влак толыныт. Эсогыл Австрий да Турций гыч, туштат мемнан шочшына-влак илат. Ме пўрымашлан таум каласена. Мемнан пелен тыгай чапле еҥ-влак улыт, нунын деч ме примерым налына, каҥашым йодына. Нунылан кужу деч кужу ўмырым тыланена.

Ю. Шамсутдинов.