Молодцы, пане дене шоктышо-влак!

Краснохолмский селасе пане дене шоктышо «Холмичи» образцовый театр нерген мемнан районышто чыланат колыныт да палат. Тудо Краснохолмский поселышто эртыше курымын 70-ше ийла мучаште негызлалтын. Ты театрым Нина Александровна Белобородова ыштен да вуйлатен. Ятыр ий ансамбльыште Владимир Николаевич Новоселов аккомпаниатор лийын.

Тўҥалтыштак коллектив вигак сеҥымашлашке шуаш тўҥалын да калык нуным шокшын вашлийын. Нуно БАССР-лан 60 ий темме лўмеш художественный самодеятельность республике фестивальыште выступатленыт, республике телевидений дене ончыктеныт, «Советская Башкирия» газетын лаштыклаштыже фоторепортаж-влак лийыныт.

2001 ий октябрь тылзе гыч «Холмичи» ансамбльым Н.А. Белобородован тунемшыже – Анатолий Митрошин вуйлаташ тўҥалын. Таче коллективым «Нефтяник» СМФДК-ын художественный вуйлатышыже Ильшат Габидуллин вуйлата. Тудын вуйлатымыж дене «Холмичи» «Липецкий казачок» йоча да самырык исполнительный искусствын IV-ше виш межрегиональный фестиваль-конкурсышто «Инструментальный жанр» номинацийыште Гран-Прим сеҥен налын. Тудо дистанционно эртен. Фестиваль-конкурсышто Россий Федераций, Беларусь Республика да Донецкий Народный Республике территорийыште илыше да 4 гыч 35 ий марте ийготан творческий коллектив да посна исполнитель-влак участвоватленыт. 304 йодмашым пуымо лийын: «Вокально-хоровой жанр» номинацийыште – 88, «Хореографий» – 89, «Инструментальный жанр» – 122. Ты конкурсышто сеҥымаш – вуйлатышылан да коллективыште улшо икшыве-влаклан пеш сай тўҥалтыш. Нунылан пиалым, сеҥымашым да супле пашам тыланена.

Н. Пята, Краснохолмский селасе «Нефтяник» СМФДК-ын вуйлатышыже.